Foto: «Nv.ua»Filippinda Goni tayfuni oqibatida kamida 16 kishi halok bo‘ldi va uch kishi bedarak yo‘qoldi. Bu haqda «TASS» xabar qildi.
Unga ko‘ra, Olbay viloyatida 10 nafar odam halok bo‘lgan. Ularning orasida besh yoshli bola ham borligi ta’kidlanmoqda. Bundan tashqari, Katanduanes provinsiyasida tabiiy ofat natijasida yana olti kishi halok bo‘lgan. Tayfun natijasida Ginobatan munitsipalitetida 3 kishi yo‘qolgan.
Mamlakat Milliy kengashi ma’lumotlariga ko‘ra, tayfun 372 mingdan ortiq oila yoki 2 million kishiga zarar yetkazgan. Hukumat qariyb 390 ming kishini yashash joylaridan evakuatsiya qilgan. Yetkazilgan zarar miqdori aniqlanmoqda.
Ta’kidlanishicha, qariyb 8,5 mingta uy elektr ta’minotidan mahrum bo‘lgan. Mintaqadagi ko‘plab yo‘llar yaroqsiz holga kelishi natijasida favqulodda xizmatlarning zarar ko‘rgan hududlarga yetib borishi qiyinlashgan.
Ma’lumot uchun, 1 noyabr kuni Filippinning Katanduanes provinsiyasiga Goni super tayfuni urildi. Mahalliy atmosfera, geofizika va astronomik tadqiqotlar xizmati ma’lumotlariga ko‘ra, Goni Filippinni 20 kilometr/soat tezlik bilan tark etadi.
Agar bo‘ron tezligi va yo‘nalishini saqlab qolsa, u 3 noyabr kuni mamlakat hududini tark etishi mumkinligi qayd etilgan.