Chexiyada dushanba kunidan boshlab ko‘chada niqob taqish butunlay bekor qilindi, shuningdek, restoranlarda «shvedcha stol»ga, 2,5 mingtagacha odam ishtirok etadigan ijtimoiy aksiyalar va Yevropa Ittifoqining aksar mamlakatlari bo‘ylab erkin safar qilishga ruxsat berildi, deya xabar berdi respublika sog‘liqni saqlash vazirligi matbuot xizmati.«Dushanba kunidan boshlab ko‘chalarda, jumladan, begona kishilar bilan uchrashganda niqob taqish bekor qilindi, faqat jamoat transporti va xonalarda niqob taqish shart», — deyiladi xabarda.
Endi kinoteatr va teatrlarda tomoshabinlar bufetlardan foydalanishi mumkin, faqat zalga o‘zlari bilan taom olib kirish oldingidek taqiqlanadi. Mehmonxonalardagi restoranlarda «shvedcha stollar»ga yana ruxsat berildi.
Sartaroshxonalarda mijozlar orasida 1,5 metrli masofa saqlash qoidasi bekor qilindi. Hammomga keluvchilar bug‘xonalardan foydalanishi mumkin, akvaparklarda esa cheklovlarsiz barcha attraksionlar ochiladi.
Shuningdek, dushanba kunidan boshlab ijtimoiy aksiyalarda 500 kishidan guruhlarga bo‘linish sharti bilan 2,5 mingtaga odam qatnashishi mumkin. Masalan, futbol maydonlarida har bir guruh uchun alohida kirish va chiqish eshiklari bo‘lgan bir nechta sektorlarga bo‘linadi. Bunday aksiya ishtirokchilari sektorlar bo‘ylab harakatlana olishmaydi va bir-biridan 1,5 metr masofa saqlashi zarur.
Chexiya fuqarolari shu paytgacha faqat qo‘shni Avstriya va Slovakiya hududlarida erkin harakatlana olishgandi. Endi bu huquqdan butun Yevropa Ittifoqi bo‘ylab foydalanishi mumkin. Faqat Portugaliya, Shvetsiya hamda Polshaning Sileziya voyevodasidan qaytib kelgan chexiyaliklar va xorijliklar chegaradan o‘tayotganda COVID-19 ga test manfiy chiqqanligi haqida hujjatni taqdim etishi zarur. Xuddi shu qoida Belgiya va Buyuk Britaniyadan Chexiyaga tashrif buyuruvchi xorijliklarga ham taalluqli.
O‘tgan bir kecha-kunduzda, mamlakat sog‘liqni saqlash vazirligi matbuot xizmatiga xabarlariga ko‘ra, Chexiyada 33 ta yangi koronavirus holati qayt etildi, 1 martdan boshlab ularning umumiy soni 10024 taga yetgan. 7230 kishi tuzalib chiqqan, 330 kishi vafot etgan. Hozirgi kunda 2464 kishi davolanmoqda, ularning aksariyati uyda.