Xitoyda 68 yoshli erkakning orqasida oʻsib chiqqan 15 kglik oʻsimta olib tashlandi, deb yozmoqda Kun.uz sayti.Tan familiyali erkak 30 yil orqasida oʻsimta bilan yashagan. Bu orada oʻsimta uzunasiga 85 sm, eniga 65 smgacha oʻsib ketgan. Shifokorlar oʻsimta erkakning oʻpkasi, umurtqasi va asosiy arteriyalariga qisman shikast yetkazgani sababli erkakni operatsiya qilishdan bosh tortib kelishgan.
Biroq erkak uyqu arteriyasini shikastlab olgandan keyin operatsiyani oʻtkazishga qaror qilingan. Xavf mavjudligiga qaramasdan, Yan Szyun ismli shifokor jarrohlik operatsiyasini oʻtkazishga jazm qilgan.
Oʻsimtani olib tashlash boʻyicha operatsiya 33 soat davom etgan. Erkak operatsiya davomida koʻp qon yoʻqotgan, biroq omon qolgan. U 4 kun jonlantirish boʻlimida qolishiga toʻgʻri kelgan, 6-kunga esa oʻzgalar yordamisiz harakatlana boshlagan.