Pepsi Superligasi 26-turidan oʻrin olgan “Navbahor” hamda “Buxoro” jamoalari oʻrtasidagi oʻyindan soʻng namanganliklar ustozi Andrey Kanchelskis uchrashuv borasidagi fikrlarini bildirib oʻtdi."Biroz asabiy oʻyin guvohiga aylandik. Yigitlar bugun yomon harakat qilishmadi. Eng muhimi – yakunda qimmatli 3 ochkoga ega chiqdik. Soʻnggi paytlardagi qayd etilgan natijalarni inobatga olgan holda bugun gʻalaba qozonishimiz shart edi. Shukr, oʻyin taqdirini foydamizga hal eta oldik. Bundan mamununman.
Endi bor diqqat-eʼtiborni keyingi uchrashuvlarga qaratamiz. Eʼtibor bersak, jamoa asosan oʻz maydonida ochkolar qoʻlga kiritmoqda ekan. Endi safar oʻyinlarda ham muxlislarimizni chiroyli gʻalabalar bilan xursand etish uchun urinamiz", - dedi rossiyalik mutaxassisning soʻzlarini keltirib oʻtdi PFL matbuot xizmati.