Futbol bo‘yicha O‘zbekiston Oliy Ligasi 30-turi doirasida 21 noyabr, shanba kuni «Paxtakor» — «Andijon» va «Navbahor» — «Lokomotiv» uchrashuvlari bo‘lib o‘tdi. «Uff.uz» xabariga ko‘ra, mavsumdagi so‘nggi o‘yinlarda futbol bo‘yicha 2015 yilgi O‘zbekiston chempioni nomi aniqlandi.
«Paxtakor» o‘z maydonida «Andijon» darvozasiga javobsiz oltita gol kiritdi va chempionlikni tantana qildi. Bu «Paxtakor» tarixidagi 11-chempionlik bo‘ldi.
Ushbu uchrashuvda hujumchi Igor Sergeev ikkita gol urib, jami 23 gol bilan Oliy Liga—2015 to‘purariga aylandi.
«Lokomotiv» esa «Navbahor» maydonida 3:2 hisobida g‘alabaga erishdi. Uchrashuvda «Navbahor» 2:1 hisobida oldinda borayotgan edi, ammo so‘nggi daqiqalarda gollar o‘tkazib yubordi.
«Qiziq tomoni, ‘Lokomotiv’ning ikkinchi goli 90+1-, uchinchi goli esa 90+2-daqiqada kiritildi», — deb yozadi «Uff.uz».
Oliy Liga—2015
30-tur uchrashuvlari
«Paxtakor» (Toshkent) — «Andijon» 6:0
Gollar: Masharipov (15), Sohibov (41), Krimes (45+1), Sergeev (72-pen., 84), Soliev (86-pen.).
«Navbahor» (Namangan) — «Lokomotiv» (Toshkent) 2:3
Gollar: Valijonov (52), Shixov (68) — Abduxoliqov (44), To‘raev (90+1), Mamazulunov (90+2).