Janubiy Koreyaning Samsung korporasiyasi azaliy raqobatchisi Apple’ga Smartflash firmasi bilan sudlashishda yordam beradi. Samsung’ning ko‘magi bilan Apple yarim mlrd dollar tejab qolishi mumkin bo‘ladi.
2015 yil fevralida Texas sudi Smartflash firmasining arznomasini ko‘rib chiqib, Apple korporasiyasini iTunes servisinining dasturiy ta’minotini ishlab chiqishda uchta patentni buzganlikda aybdor deb topdi. Kompaniya 532.9 mln dollar miqdorida jarima to‘lashga hukm qilindi. Ammo Apple ishning qayta ko‘rib chiqilishiga erishdi.
Bloomberg agentligining xabar berishicha, patentlarni lisenziyalash bilan shug‘ullanuvchi Smartflash firmasi Samsung tomonidan ishlab chiqariladigan Galaxy smartfonlari va planshetlariga ham xuddi shunday ayb qo‘ygan. Shu bois Samsung AQSh patentlar va savdo belgilarini ro‘yxatdan o‘tkazish Byurosiga (United States Patent and Trademark Office, USPTO) murojaat qilib, patentlardan ikkitasining haqiqiyligini tekshirishni so‘ragan. Ikki kundan so‘ng Byuro Smartflash patentlari aniq bo‘lmay, mavhum narsalarni tasvirlaganini tasdiqlovchi xulosa chiqardi.
Yakuniy xulosa yil oxirida sudyalar kollegiyasi tomonidan e’lon qilinadi.
Fitzpatrick yuridik kompaniyasi xodimlarining ta’kidlashicha, bunday holatlarda odatda arznoma beruchi mag‘lubiyatga uchraydi. Shu bois kuchlarini birlashtirgan ikkita gigant korporasiyaning sudda g‘alaba qozonish ehtimoli yuqoriligi taxmin qilinmoqda.
Manba: www.kun.uz