Kecha, 29 iyul kuni o‘zbek shou-biznesining favqulodda taniqli vakillaridan biri Alisher Rahmatullaev uylandi. 2009-2010 yillarda “Ledy”, “Chora-chora” va “Setora” guruhi bilan kuylagan “Begona” nomli qo‘shiqlari bilan tilga tushgan Rahmatullaev Zilola ismli qizga uylangan, deb
yozmoqda "Qalampir" nashri. Aktrisalar Halima Ibragimova va Zuhra Solievaning bergan ma’lumotlariga qaraganda, to‘y Toshkentdagi “Charog‘on” restoranida bo‘lib o‘tgan. Shou-biznes olami vakillari bilan to‘lib-toshmagan to‘y oqshomiga O‘zbekistonda xizmat ko‘rsatgan artist Ziyoda Qobilova, xonanda Jasur Umirov tashrif buyurishgan.
Ijodni endigina boshlagan davrlarda xonanda Alisher Rahmatullaev O‘zbekistonda xizmat ko‘rsatgan artist Sardor Rahimxonning shogirdi sifatida tilga tushgan edi. Keyinchalik Sardor Rahimxon Alisher Rahmatullaevga chuv tushganini, falon million pulini olib, ko‘zdan g‘oyib bo‘lganini aytib iddao qilib chiqqandi. Bu voqealar 2010 yilning oxirlari 2011 yilning boshlarida OAVlarning asosiy mavzusiga aylangandi. O‘shanda sud Alisher Rahmatullaevni ozodlik mahrum etish bo‘yicha qaror chiqardi va Rahmatullaev hibsga olindi. Ko‘p o‘tmay xonanda yana ozodlikka chiqdi. Keyingi paytlarda ijod olamida umuman ko‘rinmay qolgan Rahmatullaev endilikda san’at olamidagi faoliyatini davomi ettiradimi yoki yo‘q, bunisi bizga qorong‘u.
Fursatdan foydalanib, tahririyatimiz nomidan yangi oila vakillari Alisher va Zilolaga ulkan baxt va saodat tilab qolamiz.