Bugun Shveysariyaning Bazel shahrida joylashgan «Sankt-Yakob Park» stadionida Evropa Ligasining joriy mavsumdagi final uchrashuvi bo‘lib o‘tadi.Unda bosh sovrin uchun turnirning amaldagi g‘olibi - «Sevilya» (Ispaniya) va «Liverpul» (Angliya) jamoalari maydonga tushishadi.
Bo‘lajak final UEFA kubogini ham hisobga olganda, turnirning 45-hal qiluvchi uchrashuvidir. Musobaqa Evropa Ligasi nomini olganidan keyingi davr uchun esa, hisob bo‘yicha 7-finaldir, deyiladi "Kun" nashrida.
«Sevilya» 2006, 2007, 2014 va 2015 yillarda bu turnir finalida g‘alaba qozongan.
«Liverpul» esa turnir UEFA Kubogi deb atalgan vaqtlarda, 1973, 1976 va 2001 yillardagi finallar g‘olibi bo‘lgan.
Bugungi finalda g‘olib chiqqan jamoa 15 kilogrammli kubok bilan birga keyingi mavsumda EChLning guruh bahslarida ishtirok etish huquqini qo‘lga kiritadi.
Qayd etish kerakki, ikki jamoa ham ichki chempionatlar yakuniga ko‘ra, EChL yo‘llanmasiga ega bo‘la olmadi, «Liverpul» APL yakunlariga ko‘ra, sakkizinchi o‘rinni egallagan bo‘lsa, «Sevilya» La Ligada ettinchi o‘rin sohibi bo‘ldi. Unay Emeri jamoasi oxirgi 9ta turdan faqat bittasida, «Betis»ga qarshi derbida g‘alaba qozona oldi.
«Liverpul» Evropa Ligasida «Rubin», «Son» va «Bordo» jamoalariga qarshi bahslar o‘tkazdi. Guruh bosqichida birinchi o‘rinni egallagan jamoa keyingi bosqichlarda «Augsburg» (0:0, 1:0), «MYu» (2:0, 1:1), «Borussiya D» (1:1, 4:3) hamda «Vilyarreal» (0:1, 3:0) jamoalarini ortda qoldirdi.
«Sevilya» esa mavsumni EChLda boshladi. «Yuventus», «Manchester Siti» va «Borussiya M» bilan guruhda uchinchi o‘rinni egallagan jamoa ELning pley-off uchrashuvlarida «Malmyo» (3:0, 0:1), «Bazel» (0:0, 3:0), «Atletik» (2:1, 1:2, penaltilar bo‘yicha 5:4) va «Shaxtyor» (2:2, 3:1) jamoalari to‘sig‘idan o‘tdi.
Final Toshkent vaqti bilan soat - 21:45da boshlanadi. O‘yinga shvesiyalik Yunas Eriksson hakamlik qiladi.
UEFA kubogiga 1971 yili asos solingan. Unga qadar ham ayni shu tartibda o‘tkaziladigan musobaqa bo‘lgandi. Faqat, uni Yarmarkalar kubogi, deb atashgan. 2008-2009 yillar mavsumidan boshlab, musobaqa formati o‘zgartirildi va turnirga Evropa Ligasi nomi berildi. 1998 yilga qadar mazkur turnirda o‘z mamlakati kubogini qo‘lga kiritgan jamoalar ishtirok etmasdi. O‘sha mavsumdan boshlab Kubok egalari kubogi turniri UEFA kubogi bilan birlashtirildi. Shuningdek, o‘yinlar format bo‘yicha xuddi EChL singari o‘tkazila boshlandi.
Shu o‘rinda aytish joiz, UEFA Yarmarkalar kubogini rasman tan olmagan. Shu bois ham, o‘sha musobaqada 2 marta zafar quchgan «Lids Yunayted» UEFAning evrokuboklarda g‘olib chiqqan jamoalar ro‘yxatida yo‘q.
UEFA kubogining ilk sohibi Londonning «Tottenhem Hotspur» klubidir. «Shporlar» 2ta o‘yin natijasiga ko‘ra, «Vulverhempton Uonderers»ni 3:2 hisobida mag‘lub etishgan. Umuman olganda, turnirda turli yillarda 26ta klub zafar quchgan. Shundan 11tasi kubokni ikki marta yoki ko‘proq qo‘lga kiritgan. G‘oliblik shohsupasiga 4 marta ko‘tarilgan «Sevilya» bu borada rekordchi hisoblanadi. Mamlakatlar miqyosida Italiya va Ispaniya vakillari eng yaxshi natijaga ega - 9 martadan g‘oliblik.
Evropa Ligasi guruh bosqichida ishtirok etgan har bir klub 640 ming evrodan oladi. Shuningdek, har bir o‘yin uchun 60 mingdan beriladi. Guruh bosqichidagi g‘alabaning bahosi - 140 ming, durangniki - 70 ming evro. «Pley-off» bosqichiga yo‘l olgan jamoa qo‘shimcha 200 ming oladi. Shu tariqa, mukofot puli miqdori oshib boraveradi: nimchorak final uchun - 300 ming, chorak final uchun - 400 ming, yarim final uchun - 700 ming evro. Finalchiga 2 million evro berilsa, g‘olib jamoa o‘z g‘aznasini yana 3 million evroga boyitadi. Taqqoslash uchun, Evropa Chempionlar Ligasi guruh bosqichiga chiqqan klub 3,9 million evro oladi.