Ўзбекистонда Миллий банклараро процессинг маркази ташкил этилади. Бу ҳақда Ўзбекистон Республикаси Президенти Шавкат Мирзиёевнинг «Миллий тўлов тизимини ривожлантириш чора-тадбирлари тўғрисида»ги 2018 йил 19 сентябр куни имзолаган Фармонида кўрсатиб ўтилган.Ҳужжатга кўра, марказ тўловлар давомийлигини таъминлаш, соҳага инновацион маҳсулотларни жалб этиш, мавжуд банк хизматлари ва тўлов хизматлари бозорида рақобатни ривожлантириш мақсадида ташкил қилинмоқда.
Эслатиб ўтамиз, Ўзбекистонда шу кунга қадар Ягона умумреспублика процессинг маркази (ЯУПМ) мавжуд бўлиб, унинг тўлов тизими сифатида UzCard фаолият юритиб келган.
15 сентябрь куни тизимда кузатилган носозлик туфайли Ўзбекистонда пластик карталар орқали тўловлар амалга ошириш имконияти йўқолиб қолганди. Компания техник носозликлар POS, E-POS терминаллари ва АТМ-қурилмалари процессинг маркази билан улана олмаётгани сабаб юз берганини маълум қилганди. Тизим қайта ишлаб кетиши учун қарийб икки сутка вақт талаб қилинганди.