Mail.ru Group ҳолдинги 2017 йил майида «Одноклассники» фойдаланувчилари учун «ОК сообщения» асосида «ТамТам» мессенжерини ишга туширганди. «ОК сообщения» ишлатадиганлар янгилаш тугмасини босиш орқали «ТамТам» мессенжерини ўрнатиши мумкин қилиб қўйилди.Россияда Telegram блокланиши ортидан интернет нашрлар «ТамТам» мессенжеридаги саҳифаларни ривожлантиришмоқда ва ўқувчиларини ушбу мессенжерга жалб этишмоқда. Суд Telegram’ни блоклаш ҳақида ҳукм чиқаришидан 2 кун ўтиб «ТамТам» мессенжери фойдаланувчилари сони 10 баравар ошиб, 40 мингдан ортиқ канал очилган.
Ушбу мессенжерда «Одноклассники» билан интеграция сақлаб қолинган, аммо янги фойдаланувчилар бу сайтда аккаунти бўлмаган ҳолда, телефон рақами билан ёки Google аккаунти орқали рўйхатдан ўтиши мумкин бўлади. Ҳозирда «ТамТам»да чат-гуруҳлар очиш, суратлар, овозли хабарлар жўнатиш, каналлар очиш, шунингдек, GIF-анимациялар, мусиқа, видео ва стикерлар алмашиш, видеохабарлар, овозли қўнғироқлар ва видеоқўнғироқлар жўнатиш мумкин.
«Kun.uz» ушбу мессенжердан фойдаланишни маъқул кўрадиган ўқувчилари учун янги канал очди. Эндиликда сайт хабарларини ушбу канал орқали ҳам кузатиб бориш мумкин.
Эслатиб ўтамиз, 13 апрель куни Москва суди «Роскомнадзор»га Telegram’ни Россияда блоклашга рухсат берди. Мессенжер фойдаланувчиларнинг хабарларини очиш калитлари тақдим этилмагунча блокланади.