Бугун Ўзбекистон чемпионатининг 2-тур учрашувлари старт олади. Яъни бугун “Қизилқум” ўзида АГМКни қабул қилса, “Бухоро” клуби “Металлург” майдонига сафар қилади.Шанба куни эса, Суперлиганинг бу йилги дебютантлари “Сурхон” ва “Динамо” Термизда қарама-қарши келишади. “Локомотив” ва “Навбаҳор” жамоалари ўртасидаги ўйин ҳам қизиқарли ўтиши тайин.
Турнинг марказий ўйини Тошкентда бўлиб ўтади. Унда “Бунёдкор” клуби “Пахтакор” билан куч синашади. Ўтган турда амалдаги чемпионни мағлуб этиб пешқадамга айланиб олган “шерлар”ни осон бўлмаган ўйин кутиб турибди.
Шунингдек 31 март куни водийда "Қўқон 1912" клуби водийнинг яна бир дебютанти "Андижон" билан куч синашса, воҳада "Насаф" клуби Жиззахнинг "Сўғдиёна" клуби билан куч синашади.