Суперлиганинг 18-туридан ўрин олган “Нефтчи” - “Қизилқум” учрашуви (0:1)дан кейинги матбуот анжумани бўлиб ўтди.Унда дастлаб меҳмонлар устози Ҳамиджон Актамов саволларга жавоб қайтарди.
- Меҳмондаги ғалаба ҳамиша ёқимли бўлган, - дея сўз бошлади “Қизилқум” бош мураббийи. - Фарғонага ғалаба учун келгандик ва якунда ўз мақсадимизга эришдик. Ўйин биз учун қийин ўтди, дея олмайман. Голга тортадиган етарлича вазиятларни юзага келтира олдик. Уларнинг фақат биттасидангина унумли фойдаландик. Муҳими, уч очкони қўлга киритдик.
Ўйлайманки, “қора чизиқ”дан чиқиб кетдик ва бундан буён натижаларимиз ижобий кўринишда бўлади. Ўз навбатида бизни қўллаб-қувватлаб турган ва атайин Фарғонага етиб келган мухлисларга алоҳида миннатдорчилик билдираман. Бугунги ғалабада уларнинг ҳам хиссаси катта бўлди.
“Нефтчи” ҳақида ҳам илиқ фикрларни айтишим керак. Фақат уларга худди бизда бўлгани каби озгина вақт керак. Жамоа таркибида ёш футболчилар кўп. Ёдингизда бўлса биз ҳам шундай ҳолатга тушиб қолгандик.
“Қизилқум” кучли олтикка кира оладими? Билмадим, фолбин эмас ва олдиндан башорат қила олмайман. Жамоамиз шунга интилади. Буни сизга аниқ айта оламан.