Хабарингиз бор, Хитойда U-23 ёшликлар ўртасида Осиё чемпионати давом этмоқда. Мусобақа чорак финалида Ўзбекистон – Япония қарама-қаршилиги кузатилади. Бугун ушбу беллашув олдидан матбуот анжумани ўтказилди. Унда дастлаб японияликлар устози Хажиме Мориясу иштирок этди.- Япония олдин бу совринга эришганига қарамай, ҳозир менга ва жамоамга ҳеч қандай босим йўқ. Албатта, биз бу ерга ғалаба қозониш учун келганмиз. Лекин энг муҳими шогирдларим ҳаракатларини, фазилатларини, майдонда нималар қила олишлари мумкинлигини кўрсатишмоқда. Япония гуруҳдаги барча учрашувларда ғалаба қозонди. Аммо Ўзбекистонга қарши ўйин гуруҳдагилардан фарқ қилади. Қолаверса, энди беллашувлар мураккаблашиб бораверади.
Халқаро турнирларда кейинги босқичга ўтган барча жамоалар кучли рақибга айланади. Ўтмишдаги натижаларга қарашни истамаймиз. Шунинг учун диққатимизни Ўзбекистонга қарши ўйинга қаратганмиз.
Ўзбекистон қанчалик кучли эканлигини яхши биламиз. Улар таркибида тажрибали ва юқори даражадаги ўйинчилар бор. Айтмоқчиманки, менинг шогирдларим ақлли футбол намойиш этишлари керак. Чунки биз кучли рақибга тўғри келдик.
Бу икки жамоа ўтган йили декабрда Малайзиядаги халқаро турнирда тўқнаш келган. Ўшанда Япония пенальтилар сериасида мағлуб бўлган. Аммо мен бундан хавотирда эмасман.
Жамоани қабул қилиб олганимдан сўнг Малайзиядаги турнир менинг биринчи сафаримдир. Энди бу чемпионат иккинчиси. Олдинги таркибдан ҳозир 8 футболчи бор, - дейди Япония устози.