Фото: The TelegraphMonell Chemical Senses Center – АҚШнинг Пенсильвания штатидаги тадқиқот марказида коронавирус билан касалланган беморларда ҳид билиш қобилиятининг йўқолиши сабаблари ўрганилди. Аниқланишича, инсон организми вирусдан ҳимояланиш учун ушбу сезгининг ишлашини блоклайди. Тадқиқотчиларнинг тахминига кўра, ҳид билиш ҳақида мияга ахборот узатувчи рецепторлар ўзини ўзи йўқ қилади ва ушбу йўл билан инфекция тарқалишига қарши курашади. Бу ҳақда The Wаll Street Journal хабар қилган.
Коронавирус инфекциясини юқтириб олган беморларнинг аксарияти касалликнинг икки ҳафталик даврида COVID-19 белгилари йўқолгани, бироқ ҳид билмаётганидан шикоят қилмоқда. Кўпинча ҳид сезиш бир неча ойдан кейин қайта тикланади, лекин бу жараён ҳаммада ҳам рўй беравермайди. Мутахассислар айрим беморлар ушбу қобилиятни бутун умрга йўқотиши мумкинлиги ҳақида хавотир мавжудлигини билдирган.
Коронавирусдан тузалган беморлар ҳид билмай қандай яшаш мумкинлиги ҳақида ўз фикрларини баён этган. Улардан бири овқат ҳидини ҳис этмаётгани учун вазн йўқотганини айтган бўлса, яна бошқаси уйда ёлғиз қолишдан қўрқиши, сабаби газ ҳиди ёки тутун исини англай олмаслигидан хавотирланаётганини айтиб ўтган.
Олимлар коронавируснинг янгидан янги белгиларини топмоқда, айримлари хавфсиз, бошқалари эса етарли даражада хавфли. Аввал олимлар COVID-19’нинг асосий белгиси пневмония, яъни ўпка яллиғланиши эмас, балки гиперкоагуляция – организмдаги барча томирларда қоннинг қуюлиб кетиши, жумладан, бунинг ўпка фаолиятига салбий таъсирини аниқлаганди.