Фото: Соғлиқни сақлаш вазирлигиАхборот ва оммавий коммуникациялар агентлигида Соғлиқни сақлаш вазирлиги томонидан Ўзбекистонда коронавирус инфекцияси (COVID-19)нинг профилактикаси ва унинг кириб келишининг олдини олиш масалаларига бағишланган матбуот анжумани ташкил этилди.
Анжуманда Соғлиқни сақлаш ва эпидемиология соҳасида халқаро эсперт, Америка Микробиология жамияти аъзоси, тиббиёт фанлари доктори, профессор Михаил Фаворов дунёдаги эпидемик вазият бўйича маъруза қилди.
Айни пайтда Михаил Фаворов коронавирус инфекцияси бўйича дунё ва Ўзбекистондаги ҳолатни ўрганмоқда. Шу кунларда у мустақил халқаро эксперт сифатида Соғлиқни сақлаш вазирлиги қошидаги бош штаб мутахассислари билан биргаликда мамлакатимизга коронавируснинг кириб келиш ва тарқалишининг олдини олиш мақсадида ушбу соҳада ихтисослашган тиббиёт муассасаларидаги тиббиёт ходимларига маслаҳатлар бермоқда.
Михаил Фаворов ўз чиқишида Хитойнинг Ухан шаҳрида ишлагани ва у ерда коронавирусга чалинганлик ҳолатини яшириш учун ҳатто отувга ҳукм қилиниши мумкинлигини айтди.
Матбуот анжумани давомида Хитой элчихонаси вакили Ухан ҳақиқатда коронавируснинг учоғи бўлганини, аммо Хитой бу курашда ғолиб чиқа бошлаганини, Михаил Фаворовдан эса нимага асосланиб касаллик тарқалишида Ухан институтидаги эҳтиётсизлик сабаб бўлганига шаъма қилганлигини сўради.
Мутахассис бунга шаъма қилганини инкор этиб, керак бўлса вазиятни очиқлашини айтди:
— Мен ўз маърузамда касаллик ўша институтдан тарқалганини айтганимни кимдир эшитдими? Унда нима учун провакацион савол беряпсиз? Мана энди, ҳолат қандай бўлганини айтаман! Аслида бу ҳақда бугун гапирмоқчи эмасдим. Ўзингизга раҳмат айтинг. Демак, Хитой коммунистик партияси жуда яхши иш олиб бораётган ва бу эпидемиянинг олдини олиши мумкин эди. Бу ҳақда гап-сўз бўлиши мумкин эмас. Аммо коммунистик партия институтдан кўршапалакнинг чиқиб кетиши ҳолатини бартараф эта олмади. Вирусли кўршапалак Ухандаги бозорга тушганини биламиз, — деди Михаил Фаворов.