Шу йилнинг 10 август куни баъзи ахборот сайтларида 9 август куни Яккасарой туманида 14 ёшли қизнинг олиб қочилгани ва зўрлангани ҳақидаги хабар тарқатилди, деб маълум қилмоқда Тошкент ИИББ ахборот хизмати.Муаллифнинг сўзларига кўра, бу хабарни сайтнинг гўёки ишончли манбаси тасдиқлаган. «Тошкент шаҳар ИИББ ҳамда тизимдаги ИИОФМБ ходимлари томонидан ушбу жиноятни содир этган шахс қидирилаётгани айтилмоқда», – деб ёзилган ўша хабарда.
Тошкент шаҳар ИИББ ушбу маълумот ҳақиқатга мос эмаслигини маълум қилди. Қолаверса, август ойи мобайнида Яккасарой тумани ИИО ФМБ ва ИИБларига бу турдаги оғир жиноят юзасидан биронта ҳам ариза келиб тушмаган.
«Мазкур «янгилик»ни ички ишлар органларини обрўсизлантириш ва ўзига арзон рейтинг ишлаб олиш мақсадида эълон қилинган асоссиз маълумот сифатида баҳолаш мумкин.
Ўз навбатида, ОАВ вакилларини чоп этиладиган ҳар бир хабар учун масъулиятни ҳис қилишга, ахборотни ишончли манбалардан олишга чақириб қоламиз», - дейилади хабарда.