— Мен дугонамнинг тўйида бир йигитни учратиб қолдим. Аниқроғи, у куёвжўра эди, мен эса келиннинг ўртоғи, яъни дугонамга ҳамроҳлик қилардим. У менга тинимсиз қараб қўяр, баъзан кўзини узмасди. Мен бундан жуда ноқулай ҳолатга тушардим. Ёр-ёр садолари остида тўйхонага кираётганимизда ҳам у мендан кўз узмади. Тўй бошланганида эса мени рақсга таклиф қилганди, у ўйлаган қизлардан эмаслигимни айтиб, бақириб бердим. Нотаниш йигит индамай, мендан узоқлашди ва ўша куни кечқурун қўнғироқ қилди. Кейин билсам, телефон рақамимни тўй куни дугоналаримдан олган экан. Мени севишини айтиб, тинимсиз қўнғироқ қилаверди. Бошида унга қаттиқ-қаттиқ гапирган, ҳатто ҳақорат қилсам-да, бора-бора унга боғланиб қолдим. У мени севишига ишонтира олди. Энди мен ҳам унга кўнгил қўйгандим. Аммо орадан маълум вақт ўтиб, унинг муомаласи ўзгарди. Мендан совиб бораётгандек эди. Гаплари ҳам аввалгидек эмас, истар-истамай гапирарди. Қўнғироқ қилсам, доим кимлардир билан гаплашаётган бўларди. «Ким билан гаплашяпсиз?» десам, «Дўстларим, қариндошларим» деб баҳона қиларди. Кейин билсам, у бошқасини топган экан.
Шундай кунларнинг бирида у менга қўнғироқ қилиб, мени севмаслигини, шунчаки ўрганиб қолганини айтди. Соддалигим туфайли унга ишонганимни таъкидлаб, бунинг учун узр сўради. Бошида гапларини ҳазилга йўйдим, аммо ота-онаси уни қариндошига унаштирмоқчи эканлигини айтганида бу гаплар ҳақиқатлигини англадим. У билан алоқаларим батамом узилди. Ота-онам мени турмушга беришмоқчи, лекин бошқа йигитга кўнгил қўёлмасам-чи? Нима қилишни билмаяпман. Аммо шундай бўлса-да, ўша йигитга бахт тилайман.
Манба: Hordiq.uz