Фото: AnadoluКоронавирусга қарши вакцина ишлаб чиққан туркиялик тиббиётчилар вакцинани одамларда синашга рухсат олишди. Бу ҳақда Туркия президенти Ражаб Тоййиб Эрдўған маълум қилди.
“Туркия АҚШ ва Хитой билан бирга коронавирусга қарши ўз вакцинасини ишлаб чиқаётган давлатлар етакчи учлигига киради. Бизнинг иккита вакцина ҳайвонларда муваффақиятли синовдан ўтказилди, улардан бирининг одамларда клиник синовларини ўтказишга рухсат олинди”, деб маълум қилган Эрдўған.
Туркиялик тиббиётчилар айни вақтда коронавирусга қарши 10 та дори воситаси ва 8 та вакцина ишлаб чиқиш устида иш олиб боришмоқда.
29 июлда Туркия соғлиқни сақлаш вазири Фаҳриддин Хўжа Туркия коронавирусга қарши вакцина яратиш масаласи бўйича Россия ва Хитой билан яқин алоқада эканини маълум қилган.
Охирги ойларда турли давлатлар олимлари коронавирусга қарши кўплаб вакциналар ишлаб чиқиб, уларни синовлардан ўтказишмоқда. Баъзи олимлар анъанавий йўлдан бориб, “тирик” турдаги (кучсизланган вирус) вакциналар яратиш устида ишлашмоқда. Бошқа тадқиқотчилар эса “ўлдирилган” вакциналар ишлаб чиқмоқда. Бунда гап сунъий ўстирилган вирусни ўлдириш (мисол учун, формалин билан) ва уни организмга киритиш технологияси ҳақида боради.
Ўлдирилган вирусдан ташқари, унинг тозаланган антигенини қўллаш мумкин. Антиген инсон организмига тушиб, унинг иммун жавобини чақирувчи ёт оқсил ҳисобланади. Шунингдек, РНК-вакциналар мавжуд бўлиб, уларнинг негизида РНКнинг антигенни кодловчи қисми ётади. Бундай вакцина инсон мушагига киритилганда тўғридан-тўғри организмда антигенларни ишлаб чиқаради ва касаллик қўзғатувчисисиз иммун жавобни келтириб чиқаради.