Мусодара қилинган ниқоблар / Фото: Getty ImagesДональд Трамп Корея уруши даврида қабул қилинган қонундан фойдаланиб, ушбу ниқобларни ишлаб чиқарувчи АҚШнинг 3M корпорациясига ўз тиббий маҳсулотларини бошқа давлатларга экспорт қилишини тақиқлаган.
Берлин ҳукумати Германияга мўлжалланган 200 минг дона тиббий ниқоб Америкага жўнатилганидан сўнг АҚШни "замонавий қароқчилик"да айблади.
Берлин ички ишлар бошқармаси бошлиғи Андреас Гизелнинг сўзларига кўра, Берлин полицияси учун мўлжалланган Америкада ишлаб чиқарилган FFP2 тиббий ниқоблари Бангкокда мусодара қилинган ва АҚШга жўнатиб юборилган.
Андреас Гизел Берлинга мўлжалланган ниқобларнинг эгаллаб олиниши "замонавий қароқчилик" эканлигини таъкидлади ва Трамп маъмуриятини халқаро савдо қоидаларига риоя қилишга чақирди.
"Трансатлантикавий ҳамкорларга нисбатан бундай қилинмайди. Ҳаттоки глобал инқироз даврида ҳам Ёввойи Ғарб услубини қўллаш мумкин эмас", деди у.
Дональд Трамп Корея уруши даврида қабул қилинган қонундан фойдаланиб, ушбу ниқобларни ишлаб чиқарувчи АҚШнинг 3M корпорациясига ўз тиббий маҳсулотларини бошқа давлатларга экспорт қилишини тақиқлаган.
"Бу маҳсулотлар ички истеъмолимиз учун зудлик билан зарур. Биз уларни олишимиз шарт", - деди Трамп.
Европадаги бошқа мамлакатларнинг вакиллари ҳам америкаликларнинг тажовузкорона харидларидан норози бўлмоқда.
Масалан, Франциядаги регионал раҳбарлар америкаликлар тиббий маҳсулотларни шундоққина уларнинг бурни остидан сотиб олиб кетаётганидан шикоят қилмоқда.
"Мен ниқоблар партиясини топдим, аммо америкаликлар, мен Америка ҳукумати ҳақида гапирмаяпман, америкаликлар уч баравар қиммат нарх таклиф қилишди ва бунинг устига, олдиндан пул тўлашга тайёрлигини айтишди", - дейди Иль-де-Франс регионал кенгаши раҳбари Валери Пекрессе.
3M компанияси ойига 100 млн донага яқин N95 респираторларини ишлаб чиқаради, уларнинг қарийб учдан бир қисми АҚШда, қолган қисми эса бошқа мамлакатларда тайёрланади.