Россия пахта етиштиришни бошламоқчи. Пахта етиштириладиган майдон 200 минг гектардан кўпроққа баҳоланмоқда. 2018 йилда минг гектар ерга пахта экилмоқчи.“Пахта етиштириш бўйича иш бошланмоқда, бу биз учун янги ўсимлик, биз тайёрмиз. Айни вақтда технология масалалари ҳал қилинган, жорий йилда Астрахан ва Волгоградда минг гектар ерга чигит экилади”, деб айтган Россия қишлоқ хўжалиги вазирлигининг ўсимликшунослик, механизациялаш, ўсимликларни кимёлаш ва ҳимоялаш департаменти директори Пётр Чекмарёв Бутунроссия агрономлари йиғилишида.
“Бизда имконият бор, бизда пахта етиштирса бўладиган 200 минг гектар майдон бор. Шу сабабли ушбу хом ашё билан ўзимизни таъминлаш учун бу йўналишдаги ишни давом эттирамиз ва такомиллаштирамиз”, деб айтган Чекмарёв.
“Гап нимада – мен ҳозиргина Ўзбекистондан қайтдим. Уч йилдан кейин биз бу ерлардан пахта ололмаймиз, чунки уларда пахтани қайта ишловчи комбинатлар қурилиши фаол тарзда олиб борилмоқда ва улар бизга бир тонна ҳам пахта хом ашёси сотишмайди”, деб қўшимча қилган Чекмарёв.
Россия қишлоқ хўжалиги материалларида таъкидланишича, мавжуд мелиоратив тизимларни тиклаш ва янгиларини қуриш шарти билан Россияда пахта етиштириш бўйича максимал майдон 222 минг гектарга баҳоланмоқда (Астрахан вилоятида 47 минг, Волгоград вилоятида 10 минг, Стравропол ўлкасида 120 минг, Қолмиғистонда 24 минг ва Қримда 10 минг гектар).
Россия корхоналарининг пахта толасига эҳтиёжи 2018 йилда 68 минг тоннага, 2019 йилда эса 71,1 минг тоннага баҳоланмоқда.