Австрия канцлери Себастьян Курц Туркия охирги йиллар олиб бораётган сиёсати туфайли Европа Иттифоқи аъзоси бўла олмаслигини айтди.“Бу давлатда биз инсон ҳуқуқлари, асосий ҳуқуқ ва эркинликларнинг жиддий бузилишларига дуч келмоқдамиз. Европа Иттифоқи буни кўриб, ўзини ҳеч нарса бўлмаётгандек тутишини қабул қила олмайман. Фикримча, Туркияга охирги йиллар олиб бораётган сиёсати туфайли Европа Иттифоқида ўрин йўқ. Унинг иттифоққа кириши бўйича музокаралар тугатилса адолатли бўларди”, деб айтган Курц Bild am Sonntag нашрига берган интервьюсида.
Курцнинг айтишича, Туркия Австрия, Германия ва бошқа давлатлардаги туркларнинг интеграцияси юз бермаслиги учун бу давлатлардаги турк жамоатига кучли таъсир қилишга уринмоқда.
Аввалроқ Туркия ташқи ишлар вазирлиги Австриянинг янги ҳукумати дастурига норозилик билдирганди. Дастурда Вена Туркиянинг ЕИга кириши бўйича музокаралар тўхтатилишини қўллаб-қувватлаши айтилган.
Брюссель ва Анқара ўртасидаги муносабатлар Туркияда давлат тўнтарувига уринишдан кейин ёмонлашган. Европа Иттифоқи тўнтарув билан боғлиқ оммавий ҳибсга олишлар, Анқара кўрган бошқа чораларни танқид қилиб, Туркиянинг Европа Иттифоқига кириши бўйича музокараларнинг янги босқичига ўтишни тўхтатган.
Айниқса Туркиянинг Европа Иттифоқига киришига қаршилик қилаётган Австрия ва Германия билан муносабатлар кескинлашиб кетган.
Манба: Kun.uz