АОКАда Давлат тест маркази ахборот хизмати раҳбари Орзиқул Бобоев иштирокида брифинг ўтказилди. Унда қатор саволларга жавоб берилди.
Миллий тест тизими тўлиқ жорий этилдими? Ҳамма фанлардан сертификат бериш бошландими?
Бугунги кунга қадар она тили ва адабиёт, математика, кимё ва биология фанларидан жорий этиб бўлинди. Ушбу фанлардан тест синови ўтказилиб, керакли натижага эришган талабгорларга миллий сертификат топширилмоқда.
Булардан ташқари, гарчи физика фанидан 2022 йилда жорий этиш белгиланган бўлса-да, бу йил унинг устувор фанлар сирасига киритилганлиги боис, ушбу фандан сертификатлашни жорий йилдаёқ йўлга қўйиш режалаштирилган.
Бу йилдан таълим йўналишлари сонини чексиз танлаш мумкинлиги тўғрими?
ДТМ абитуриентларнинг таълим йўналишларини танлашда чекловларни олиб ташлашга оид таклифлар ишлаб чиқди ва керакли ташкилотларга юборди.
Агар бу таклиф қабул қилиниб, норматив-ҳуқуқий ҳужжат асосида тасдиқланса амалга ошиши мумкин. Ҳозирча бу борада ўзгариш йўқ. Шунинг учун, 5 тагача танлов амалда.
Ўтган йилларда ўтказилган тест синовларида ёзувсиз харита, жадвал, расмли кўринишдаги янги тест топшириқлари қўлланилган эди. Бу йил ҳам қўлланиладими?
Ҳа, албатта. Абитуриентларнинг тест топшириқларини тез англай олишлари, фикрлашлари ва вақт тежашлари учун жорий йилда ҳам тарих, география, шунингдек, инглиз, немис, француз тиллари, биология ва кимё фанларидан ёзувсиз харита, жадвал, расмли кўринишдаги тест топшириқлари бўлади.
Бу йил 5 та фандан тест синови белгиланди, лекин нега 3 соат 30 дақиқа берилди. Ўтган йили 2 та фандан 3 соат вақт берилган эди?
Бу вақтинчалик тартиб ўтган йили юртимизда пандемия шароитини ҳисобга олган ҳолда жорий этилган эди. Бу йил шароит ўтган йилга қараганда анча барқарор, шунинг учун Вазирлар Маҳкамасининг 2018 йил 3 апрелдаги 261-сон қарори билан тасдиқланган низомда белгиланганидек, ҳар 30 та тест топшириғига 1 соат вақт ажратилади.
Онлайн рўйхатдан ўтаётганда таълим йўналишларини ҳам ўзбек, ҳам рус тилидагиларини танласа бўладими?
Йўқ, танлаб бўлмайди. Таълим йўналишларини танлашда таълим шакли ва таълим тили бир хил бўлиши талаб этилади.