Фото: novyny.org
АҚШ Касалликларни назорат қилиш ва олдини олиш маркази (CDC) мамлакатнинг коронавирусга қарши тўлиқ эмланган аҳолисига ниқоб тақмаслик, кўчада ва бино ичида ижтимоий масофа сақламаслик учун рухсат берди. Янги тавсиялар CDC директори Рошель Валенски томонидан тақдим этилди, деб ёзади Meduza.
«Тўлиқ эмланган ҳар қандай киши бино ичида ва очиқ ҳавода ниқобсиз ва масофа сақламасдан юриши мумкин. Агар тўлиқ эмланган бўлсангиз, пандемия сабабли тўхтатиб қўйган ишларингизни давом эттиришингиз мумкин. Барчамиз одатий ҳаётга қайтиш имконини берадиган ушбу дақиқани орзиқиб кутдик», — деди CDC раҳбари.
Шу билан бирга, тўлиқ эмланган америкаликлар, федерал ёки штат қонунлари, шунингдек маҳаллий бизнес қоидалари талаб қилган тақдирда, ниқоб тақиш ва масофани сақлашда давом этиши керак. Шунингдек, улар жамоат транспортида, аэропортларда ва темир йўл станцияларида ниқобда бўлиши лозим.
CDC стандартларига кўра, фуқаро вакцинанинг охирги дозасини қабул қилганидан кейин икки ҳафта ўтгач тўлиқ эмланган ҳисобланади.
Ҳозирги кунда АҚШда учта вакцина тасдиқланган: икки дозаси талаб қилинадиган Pfizer ва Moderna ҳамда битта дозаси етарли бўлган Johnson & Johnson.
CDC маълумотларига кўра, бугунги кунга қадар АҚШда 154 миллион киши (аҳолининг 46 фоизи) камида битта доза қабул қилган. 117,6 миллион киши (аҳолининг 35 фоизи) тўлиқ эмланган ҳисобланади.
Оқ уй ҳисоб-китобларига кўра, 4 июль — АҚШ Мустақиллиги кунига қадар мамлакатда тўлиқ эмланганлар сони 160 миллионга етади.
Март ойи бошида АҚШнинг Техас ва Миссисипи штатлари ниқоб тақиш мажбуриятини бекор қилиб, тадбиркорлар учун чекловларни олиб ташлаган эди. Оқ уй эса мазкур қарорнинг хато эканини айтган.
Апрель ойида Исроилда коронавирус билан касалланиш даражасининг пасайиши муносабати билан аҳолига кўчада ниқоб тақиш мажбурияти бекор қилинди. Шунингдек, Исроил коронавирусга қарши эмланганлар учун 23 май куни ўз чегараларини очишини маълум қилди.