Фото: «Севимли» телеканалиИжтимоий тармоқларда «Севимли» телеканалида эфирга узатилаётган «Гунеш қизлари» турк сериалидаги калта шорти кийган қизнинг оёқлари хиралаштирилгани акс этган суратлар тарқалди. Қизларнинг оёқлари хиралаштирилиши ҳолатларини сериалнинг бошқа саҳналарида ҳам кўриш мумкин.
Айрим кадрларда қизлар танасининг очиқ қисмлари муҳаррирлар эътиборидан четда қолган. Бироқ айнан ушбу саҳна бошқа ракурсдан кўрсатилганида қизнинг оёқлари хиралаштирилган.
Фото: «Севимли» телеканали
Фото: «Севимли» телеканали
«Gazeta.uz» ушбу ҳолатларга ойдинлик киритиш мақсадида телеканал бош муҳаррири ўринбосари Қаҳрамон Саидалиев билан боғланди.
Фото: «Севимли» телеканали
Қаҳрамон Саидалиев очиқ кийинган сериал қаҳрамонларининг тана қисмлари муҳаррирлар томонидан хиралаштирилишини тан олган.
«‘Гунеш қизлари’ сериали ёз фаслида суратга олингани учун актриса у ерда калта шортида кўринади. Биз буни максимал даражада хиралаштиришга ҳаракат қиламиз. Муҳаррирларимиз шу мақсадда бироз хиралаштирибди», — дейди у.
Бош муҳаррир ўринбосари кадрларни хиралаштириш бўйича давлат томонидан ҳеч қандай талаб йўқлигини айтиб ўтган.
«Биз буни амалдаги қонунчиликдан, умумий ўзбек менталитети, одамларнинг дунёқарашидан келиб чиқиб қиламиз. Кимдир бу ҳақда салбий фикр билдиради, кимдир тўғри қарайди. Шунга қарамай, масалан, бизнинг шаҳарларимизда ҳам қизлар шундай кийинади. Жамиятда аҳолининг маълум қатлами бунга диний нуқтаи назардан қарайди. Масалан, уларга бу ёқмайди», — дейди у.
Қаҳрамон Саидалиевнинг қайд этишича, Ўзбекистон қонунчилигида «Ёшларнинг маданий ва маънавий ривожланишига таъсир кўрсатувчи ахборотни тарқатиш» га оид мезонлар мавжуд.
«Алоҳида қонун ҳужжатида бу қайд этилмаган, бироқ умумий қонунчиликда бор», — дейди Севимли телеканали вакили.
«Агар ўзбек телеканалларини 26 миллион киши томоша қилса, биз уларнинг фикрини, ижтимоий тармоқлардаги изоҳларини ўрганамиз. Шундан ҳамда умуммиллий қадриятларимиздан келиб чиққан ҳолда биз аҳоли учун тоза, яхши сериал, одамларга ёқадиган кино тақдим этишга ҳаракат қиламиз. Агар очиқ кийимлар туфайли эътирозлар бўлса, бундай ҳолларда бироз кийимларни ёпишга ҳаракат қиламиз. Айрим ҳолларда кино ёки сериалнинг мазмунига таъсир кўрсатмаса, бундай кадрларни тўлиқ олиб ҳам ташлашимиз мумкин», — дея қўшимча қилади у.
Бош муҳаррир ўринбосари бу томошабинлар фикрини инобатга оладиган телеканал сиёсати эканлигини алоҳида қайд этган.
«Ўзбек телевидениесининг ривожланиши билан марказий каналлар сони 18-19 тага яқинлашди. Одамларда танлаш ҳуқуқи бор. Агар бу сизнинг оилангизга ёқмаётган бўлса, бошқа канални кўришингиз мумкин. Бироқ биз одамлар фикрини тинглашга ҳамда сериалларга ўзгартириш киритишга ҳаракат қиламиз», — дейди Қаҳрамон Саидалиев.
Севимли нодавлат телеканали ўзини оила қадриятлари ва одамларнинг бирлиги, ҳар бир уйда меҳр ва нур, бахт ва қувонч ҳисобланувчи оилавий телеканал сифатида тавсифлайди.