Адлия вазири ўринбосари Музраф Икромов АОКА қошида бўлиб ўтган брифингда карантин чоралари асослари ҳақида тўхталиб ўтди.«Коронавирус билан оммавий зарарланишнинг тарқалишига йўл қўймаслик бўйича қонунларда кўзда тутилган мақсадларга етишиш учун кўрилаётган чоралар мутаносиб ёки етарли эмаслиги ҳақидаги фикрга асло қўшилиб бўлмайди», деди вазир ўринбосари ўз чиқишида.
Таҳлиллар кўрсатишича, 2020 йилнинг 11 июль ҳолатига Ўзбекистонда коронавирусдан ўлим ҳолатлари ҳар 1 миллион кишига 2тани ташкил этмоқда. Бу мамлакатда коронавирус илк қайд этилганидан буён ўтган тўрт ойдан кейинги кўрсаткичдир. Шу даврда дунёнинг 35та давлатида ушбу кўрсаткич 100-1230 нафар оралиғида бўлиб турибди, дунёдаги ўртача кўрсаткич эса ҳар 1 миллион кишига 72 нафар бўлиб турибди.
«Ўзбекистон бу борада 159-ўринда жойлашган, агар мамлакатимиз аҳолиси сонини инобатга олсак, бу энг яхши кўрсаткичлардан биридир. Бошқа томондан, бу ҳолат Ўзбекистон чеклов чораларини ўз вақтида киритиш эвазига 2,5-20 минггача бўлган кишиларнинг ҳаётини сақлаб қолганини англатиши мумкин», дея Музраф Икромовнинг сўзларини келтирмоқда Kun.uz нашри.
Маълумот учун, Ўзбекистонда 15 март куни коронавирусдан зарарланишнинг илк ҳолати қайд этилиши ортидан қатъий карантин жорий этилганди. Май ойининг биринчи ярмида карантин чоралари босқичма-босқич юмшатилди. Май ойи ва июнь ойида мамлакатда эпидемиологик ҳолат барқарор сақланиб турди, аммо июнь ойи охири ва июль ойи бошида кунлик касалланишлар сони 400дан ошди ва республика махсус комиссиясининг қарорига кўра 10 июлдан 1 августгача яна қатъий карантин жорий этилди.
Сўнгги маълумотларга кўра. Ўзбекистонда шу вақтгача 13360 кишида касаллик аниқланган, шу вақтгача беморларнинг 62 нафари вафот этган, 7852 киши тузалиб чиққан, айни вақтда шифохоналарда 5446 нафар бемор даволанмоқда.