Путин коронавирус бўйича фавқулодда йиғилиш ўтказди

^{Кремлнинг матбуот хизмати}
Россия президенти Владимир Путин коронавирус тарқалиши билан боғлиқ вазиятни муҳокама қилиш учун йиғилиш ўтказди, дея хабар беради РИA Новости.
Учрашувда Москва ҳокими Сергей Собянин, Бош вазир ўринбосари Татьяна Голикова, Роспотребнадзор раҳбари Aнна Попова ва Соғлиқни сақлаш вазири Михаил Мурашко иштирок этди.
Учрашув давомида президент вазиятни муҳокама қилиш учун 24 март куни ҳукумат билан учрашишини айтди.

Собяниннинг таъкидлашича, Россияда коронавирус кучайишидан аввалдан кўрилган чоралар туфайли таъсири камайиши мумкин. Унинг таъкидлашича, сўнгги 10 кун ичида Россияга чет элдан миллион киши келган. Унинг сўзларига кўра, дунёда касалланиш даражаси ҳақидаги ҳақиқий манзара номаълум.

Собянин шунингдек, кекса ёшдаги одамларнинг уйда карантин ҳолатида қолиши талаби COVID-19 билан касалланиш даражаси юқори бўлган бошқа минтақаларга ҳам татбиқ этилишини таъкидлади.