Польша парламентининг қуйи палатаси – сейм Россия сиёсатчилари, хусусан, президент Владимир Путиннинг Иккинчи жаҳон уруши бошланишида Польшанинг роли ҳақидаги “иғвогарона” ва “ёлғон” сўзларини қоралади. Бу ҳақда Azon.uz нашри хабар бермоқда.Cейм қабул қилган резолюцияга кўра, Иккинчи жаҳон урушини икки тоталитар тузум – нацистлар Германияси ва коммунистик Совет Иттифоқи бошлаган. Шунингдек, ҳужжатда Гитлер ва Сталин 1939 йилнинг 23 августида махфий пакт тузганидан кейин бошланган тажовузнинг илк қурбонлари Польша ҳамда Марказий ва Шарқий Европа мамлакатлари бўлгани айтилган.
Резолюцияда Совет Иттифоқининг “учинчи рейх”га қарши курашдаги ҳаракатлари эътироф этилган бўлса-да, бироқ бу Марказий ва Шарқий Европа мамлакатларига мустақиллик ва суверенитетни олиб келмагани, инсон ҳуқуқларини таъминламагани таъкидланган.
Россия президенти Владимир Путин ўтган йилнинг 20 декабрида, кейин 24 декабрида Иккинчи жаҳон уруши ҳақида гапирди. Унинг сўзларига кўра, урушнинг бошланишида Польшанинг ҳам айби бор, мамлакат раҳбарияти антисемит бўлган. Шунингдек, Путин 1939 йилгача Польшанинг Германиядаги элчиси бўлган Юзеф Липскийни “аблаҳ ва антисемит чўчқа” деб атади.
Шундан сўнг Польша бош вазири Матеуш Моравецкий Россия президенти кўп марта атайин Польша ҳақида ёлғон гапирганини маълум қилди.