2019 йилнинг июль ойида истеъмол бозорида ўртача нархлар даражасининг пасайиши қайд этилиб, ой давомидаги дефляция кўрсаткичи 0,4 %ни ташкил қилди. Бу ҳақда Давлат статистика қўмитасига асосан Kun.uz хабар бермоқда.Умумий ҳисобда 2019 йилнинг январь-июль ойлари давомида истеъмол бозоридаги товарлар ва хизматлар нархи 5,2 %га қимматлашди. 2018 йилнинг июль ойига нисбатан республика истеъмол секторидаги ўртача нархлар даражаси 13,5 %га кўтарилган.
2018 ва 2019 йилларнинг январь-июль ойлари давомида ойлик нархлар ўзгаришини таҳлилига кўра, 2018 йилда бўлгани каби, 2019 йилнинг июнидан бошлаб ой давомида умумий истеъмол нархлари даражасининг пасайиши қайд этилди. Бу асосан мавсумий тенденциялар ва оммавий равишда мева-сабзавот маҳсулотлари нархларининг пасайиши билан боғлиқ.
Ўтган йилнинг декабрь ойига нисбатан 2018 ва 2019 йиллар дастлабки етти ойи давомидаги истеъмол нархларининг таққосланиши шуни кўрсатдики, нархлар энг юқори кўтарилиши чўққиси май ойида кузатилган (2018 йилда 106,6 %, 2019 йилда 106,0 %).
2018 йилнинг январь ойидан 2019 йилнинг июль ойига қадар йиллик кўринишдаги йиғма истеъмол нархлари индекси ўсиши динамикаси (ой, ўтган йилнинг мос ойига нисбатан) умумий тенденциянинг босқичма-босқич пасайиши билан тавсифланади. Жумладан, нархлар кўтарилишининг энг юқори даражаси 2018 йилнинг январь ойида қайд этилган бўлиб (20,1 %), 2019 йилнинг июль ойигача босқичма-босқич пасайиб келган (13,5 %).
Умумий ҳисобда, 2018 йилнинг январь ойидан 2019 йилнинг июль ойига қадар йиллик истеъмол нархлари индексининг минимал кўрсаткичи 2019 йилнинг январь ойида (113,0 %) қайд этилган.
Йирик гуруҳлар бўйича нархлар ўзгаришига кўра, 2019 йилнинг июль ойи натижалари бўйича товарлар нархлари 0,6 %га, жумладан, озиқ-овқат маҳсулотлари 1,3 %га пасайди. Ноозиқ-овқат маҳсулотлари нархлари ой давомида 0,4 %, хизматлар эса 0,2 %га қимматлашди.
Умумий ҳисобда 2019 йилнинг январь-июль ойлари давомида озиқ-овқат маҳсулотлари нархлари 4,6 %, ноозиқ-овқат маҳсулотлари 5,7 %, хизматлар 5,6 %га қимматлашди. Йиллик кўринишда (2019 йил июль ойи 2018 йилнинг июль ойига нисбатан) озиқ-овқат маҳсулотлари нархлари 17,4 %, ноозиқ-овқат маҳсулотлари 9,5 %, хизматлар 12,7 %га кўтарилди.