Apple компанияси сентябрда тақдим қилинган янги iPhone XS ва XS Max смартфонлари сотувга чиққандан кейин сотилиши тўхтатилган iPhone X смартфонларини яна ишлаб чиқара бошлади. The Wall Street Journal нашрининг ёзишича, компаниянинг iPhone X’ни яна сотувга чиқариши янги авлоддаги айфонларга талаб пастлиги ва Apple’нинг Samsung олдидаги мажбуриятлари билан боғланган. Samsung компанияси Apple смартфонлари учун OLED-экранларни етказиб беради ва келишувда маълум миқдордаги дисплейларни етказиб бериш кўзда тутилган.
Аввалроқ Apple янги моделлари – iPhone XS, XS Max ва арзонроқ модели XR’га буюртмалар олишни қисқартириши маълум қилинган. Бунинг ўрнига Apple ўтган йилги iPhone 8 ва 8 Plus моделлари учун буюртмалар олишни кўпайтирган. 2017 йилда тақдим қилинган бу смартфонлар iPhone XR’дан 20 фоиз арзонроқ туради.