Ўзбекистоннинг олий ўқув юртларига кириш учун топширилган тест синовлари натижалари ушбу ҳафта охирида эълон қилинади. Бу ҳақда Давлат тест маркази ходими Kun.uz мухбирига маълум қилди.“Тест синовлари натижалари ҳафта охирида эълон қилинади. Аниқ санасини айта олмайман”, – деди ДТМнинг исми тилга олинишини истамаган ходими.
Шунингдек, у тест натижалари чиқиши ҳақида бир кун олдин эълон қилинмаслигини, абитуриентлар ўз натижаларини махсус SMS-хизмат орқали билиб олишлари мумкинлигини айтди.
Шунингдек, Ўзбекистон Миллий университетидаги манбаимиз тест натижалари бугун, 15 август куни эълон қилиниши мумкинлигини хабар қилди.
Эслатиб ўтамиз, 1 август куни имтиҳон топширган абитуриентлар тўплаган балларини, талабаликка тавсия этилганлиги ёки этилмаганлигини ҳамда ўқиш давлат гранти ёки тўлов-контракт асосида эканлигини билиш учун UCell ва UzMobile мобил компанияларига уланган телефонлар орқали 5100 рақамига жавоблар варақаси рақамини SMS-хабар шаклида жўнатиши ҳамда натижаларни Ўзбекистон Республикаси таълим муассасаларига қабул қилиш бўйича Давлат комиссиясининг қарори чиққандан кейин билиб олиши мумкин бўлади.
5100 рақамига жўнатилган барча SMS-хабарлар бепул, 5101 рақамидан келган барча SMS-хабарлар нархи 0.75 долларни ташкил қилади.
Тест синови натижаси билан боғлиқ SMS-хизматлар Ucell ва UzMobile мобил компанияларига уланган телефонлар орқали амалга оширилади.