Қашқадарё вилояти Косон тумани «Бўлмас» қишлоқ фуқаролар йиғинида жойлашган 23-умумий ўрта таълим мактабининг 3 та ўқув биноси мавжуд бўлиб, бугунги кунда бу ўқув биноларида дарс жараёнларини ўтказиш ўта хавфли бўлиб қолган.Сабаби бу ўқув бинолари 1 қаватдан иборат бўлиб, 1932 йил, 1980 йил ва 2002 йилда қурилган ва анчайин таъмирталаб ҳамда «хароба» ҳолатга келиб қолган.
Айрим синфхоналарни том қисмига тираб қўйилган устунлар ушлаб турибди. Агарда бу устунлар силжиб кетса, бино ўқувчиларнинг устига қулаб тушиш хавфи жуда юқори.
Бу борада Косон тумани ҳокими ва туман халқ таълими масъуллари ҳам хабардор. Аммо мактаб директорининг сўзларига кўра мактабда қурилиш ишлари кечиктирилмоқда.
Шунигдек, мактаб фойдаланишга яроқсизлиги тўғрисида Қашқадарё вилоят Қурилиш соҳаси ҳудудий назорат инспекциясининг ҳам техник хулосаси бор. Аммо муаммога ечим йўқ.
Тез кунларда мазкур муаммоларнинг ечими ҳақида тайёрланган мақолани ҳукмингизга ҳавола этамиз.
Дилшод НАБИЕВ