Ўзбекистон ҳукумати тадбиркорлар фаолиятини текширишда «хатарлар таҳлили» тизимини жорий этишни режалаштирмоқда.Ўзбекистон Савдо-саноат палатаси «Тадбиркорлик фаолиятини ривожлантиришни қўллаб-қувватлаш ва бизнес юритиш шароитини яхшилаш тизимини тубдан такомиллаштириш чора-тадбирлари тўғрисида»ги президент фармони лойиҳасини эълон қилди.
Ҳужжатда айтилишича, Ўзбекистоннинг назорат қилувчи органлари тадбиркорлар фаолиятини текширишда «хатарларни таҳлил қилиш» тизимини жорий этади.
Тизим тадбиркорлик субъектлари фаолиятининг турларини хавф тоифаларига тақсимлайди. Уларнинг асосида тадбиркорларни текширувлар жадвалига киритиш имконияти кўриб чиқилади.
Фармон лойиҳасида айтилишича, хатар даражаси паст бўлган тадбиркорлик субъектлари текширувлардан озод қилинади.
Хатар даражаси паст бўлган гуруҳга ҳисоботини мунтазам ва ишончли тарзда тақдим этувчи, шунингдек, белгиланган солиқлар ва бошқа мажбурий тўловларни ўз вақтида тўлаб борувчи тадбиркорлик субъектлари киритилиши режалаштирилган.