Ўзбекистонда жорий йил якунлари бўйича инфляция даражаси тахминан 14 фоиз, 2018 йилда — 12—13 фоиз бўлиши прогноз қилинмоқда. Бу ҳақда Олий Мажлис Сенатининг 20 декабрь, чоршанба куни бўлиб ўтган 13-ялпи мажлисида Бош вазир ўринбосари, молия вазири Жамшид Қўчқоров маълум қилди. Бу ҳақда «Газета.uz»га таяниб «Дарё» хабар берди.Унинг таъкидлашича, Президент Шавкат Мирзиёев мансабдор шахсларга реал статистик кўрсаткичларни маълум қилишни ва кутилаётган инфляция даражаси ҳақида очиқ гапиришни топширган.
«Очиқ гапирадиган бўлсак, ушбу минбарларда туриб баъзи рақамларни маълум қилганимизда, кўпчилик одамлар ичида кулиб қўйган ҳолатлар ҳам бўлган. Шу туфайли инфляция масаласи бўйича ҳурматли сенаторлар, ҳокимларга юзланмоқчимиз: йил якунлари бўйича инфляция даражаси ростдан ҳам юқори бўлиши кутилмоқда, келаси йил ҳам баланд даража прогноз қилинмоқда», — деди у.
У ўтган йилларда бир қатор кўрсаткичлар бўйича жиддий фарқлар кузатилганини айтди. «Масалан, Халқаро валюта жамғармаси бизнинг инфляцияни ҳисоблаш услубимизни жиддий танқид қилди. Сентябрда Президентнинг статистика тизимини такомиллаштириш ва ХВЖнинг маълумотлатни тарқатиш умумий тизимига қўшилиш ҳақидаги қарори чиққач, статистика соҳасида катта ўзгаришлар кузатилди. Натижада энди ҳеч бир молиявий институт Ўзбекистон нотўғри ҳисоб-китобларни амалга ошираётганини хаёлига ҳам келтирмаяпти», — деди Бош вазир ўринбосари.
Жамшид Қўчқоров статистик ахборотнинг очиқлиги ва халқаро стандартларга ўтиш халқаро ташкилотлар талабларини бажариш учун эмас, балки биринчи навбатда Ўзбекистон халқига ҳақиқий ахборотни «борича» бериш мақсадида таъминланаётганини таъкидлади. Бундан ташқари, бу мутахассисларга иқтисодиётдаги реал вазиятни кўриш имконини беради.