Тошкент шаҳар ҳокимлигида 3 октябрь куни пойтахтда олиб борилаётган қурилиш ва ободонлаштириш ишларининг бориши юзасидан матбуот анжумани бўлиб ўтди. Матбуот анжуманида иштирок этган шаҳар архитектура ва қурилиш бош бошқармаси бошлиғи ўринбосари Асомиддин Тожиев Тошкент шаҳрига хорижий сайёҳларни жалб қилиш юзасидан олиб борилаётган ишлар ҳақида маълумот берди.«Тошкент шаҳрига сайёҳлар қадимий ва тарихий обидаларни кўриш учун ташриф буюради. Пойтахтга сайёҳларни жалб этиш мақсадида ‘Чорсу’ меҳмонхонаси ва бозори ўртасидаги ҳудудда янгича бозор ва туристик маршрут барпо этилади. Бу маршрут Чорсу бозори яқинидаги Кўкалдош масжидидан бошланади, Зарқайнар орқали ўтиб, Хасти Имом комплексида якунланади. Бу жудаям қизиқарли лойиҳа бўлади», — дейди Асомиддин Тожиев.
Шунингдек, шаҳар бош архитектори ўринбосари «Чорсу» меҳмонхонаси ҳам айни пайтда қайта реконструкция қилиниши режалаштирилаётганини таъкидлаб ўтди. Мазкур иншоот тўрт юлдузли меҳмонхона сифатида иш бошлаши кутилмоқда.
Манба: Daryo.uz