Yevropa futbolida muxlislar fikri juda muhim ahamiyatga ega.Ishqibozlar bilan kerak bo‘lsa, futbol yulduzlari, murabbiylar, hatto klublar prezidentlari ham hisoblashadi. Futbol muxlislar uchun o‘ynaladi, degan naql o‘sha tomonlarda haqiqatan o‘z isbotini topgan.“Roma” rasmi sayti UYEFA Konferensiyalar ligasi guruh bosqichining birinchi turida Bolgariyaning SSKA klubiga qarshi o‘tkazilgan uchrashuvda jamoaning eng yaxshi o‘yinchisini aniqlash maqsadida muxlislar o‘rtasida o‘tkazilgan so‘rov natijasini e’lon qildi.
Takror bo‘lsa-da, yoqimli ekanini inobatga olib, Shomurodovning 5:1 hisobidagi g‘alabaga qo‘shgan hissasini yana bir bor ega olamiz. Joze Mourino o‘ziga berilgan qisqa vaqt ichidayam jamoaga katta foyda keltirayotgani uchun Eldor Shomurodovni xalqaro miqyosdagi uchrashuvda boshlang‘ich tarkibda maydonga tushirdi.
Oldindan aytish joizki, Shomurodov Bolgariya vakiliga qarshi o‘tgan uchrashuvda jamoaga angliyalik yulduz Temmi Abraxamdan ko‘proq foyda keltirishga qodirligini, transfer summasi 40 million yevro bo‘lgan o‘yinchi bilan tengma-teng raqobatlasha olishini ko‘rsatib qo‘ydi.
Eldor juda faol o‘ynadi, ko‘p harakat qildi, yakkakurashlarda o‘zini ko‘rsatdi, himoyaga yordam berdi, raqibdan to‘pni olib qo‘ydi, jamoadoshlarini qulay pozitsiyasiga chiqarish, xavfli vaziyatlar yaratish, darvozaga zarba berishga intildi.
38-daqiqada legionerimiz Stefan El-Shaaravining goliga assistentlik qildi. Bu gol uchrashuvda burilish nuqtasi bo‘ldi va ustunlikni rimliklar tomoniga og‘dirdi. Ikkinchi bo‘limda ham faollikni susaytirmagan hamyurtimiz 84-daqiqada asosiy raqobatchisi Temmi Abraxamni ham bir pas bilan golli vaziyatga chiqardi.
Shu kuni uchrashuvda jamoa Sardori Lorenso Peleggrini ikkita va Manchini Janluka Manchini bitta gol urib, yirik g‘alabani ta’minladi.
“Roma” klubi o‘tkazgan so‘rovda jamoa muxlislari bu g‘alabada Eldor Shomurodovning hissasi eng katta bo‘lganini inobatga olib, unga yuksak baho berdi va uchrashuvning eng yaxshi futbolchisi, deb e’tirof etdi.
Joze Mourino bu uchrashuvda shogirdlarining o‘yin sifati kutilganidek bo‘lmagani uchun ularni tanqid qilgan bo‘lsa-da, muhim bellashuvda Eldor Shomurodov va Lorenso Pellegrini yaxshi o‘ynaganini alohida tilga oldi.
- Haqiqatan ham guruh bosqichidagi birinchi uchrashuvda g‘alaba qozonish juda muhim edi. Biz buni uddalaganimizdan mamnunmiz. Endi keyingi o‘yinlarga e’tibor qaratib, puxta tayyorgarlik ko‘rishimiz kerak, - dedi Eldor Shomurodov.
Eldor Shomurodov “Roma” futbolchisi sifatida jamoasining oltita rasmiy uchrashuvida maydonga tushdi. Shulardan faqat ikkitasini boshlang‘ich tarkibda boshlagan hamyurtimiz bitta gol va to‘rtta golli pas muallifi sifatida “gol+pas” tizimida besh ball jamg‘ardi.
“S” kvartetidan joy olgan “Roma” UYEFA Konferensiyalar ligasi guruh bosqichidagi navbatdagi uchrashuvni 30 sentabr kuni Ukrainada “Zarya” jamoasiga qarshi o‘tkazadi. Lugansklik futbolchilar birinchi turda Norvegiyada “Bude-Glimt” jamoasi mehmoni bo‘lib, 1:3 hisobida imkoniyatni boy berdi.
A Seriyada esa “Roma” to‘rtinchi turda “Verona” mehmoni bo‘ladi. Bu uchrashuv 19 sentabr kuni Toshkent vaqti bilan 21:00 da boshlanadi.
original
Oldindagi uchrashuvlarda ham Eldor Shomurodovni boshlang‘ich tarkibda o‘yinga tushishini kutiib qolamiz. Zero, Shomurodovning transfer narxi Abraxamnikidan ikki barobar kam bo‘lsa-da, legionerimiz “Roma”da ham o‘z o‘rni borligini isbotlab bo‘ldi. U asosiy tarkibda o‘ynashga loyiq.
Shunday emasmi, siz nima deysiz, aziz muxlislar?