O‘zbekistonda oltin, mis va volfram zahiralari topildi, deb xabar qildi Geologiya qo‘mitasining Mineral xomashyo bazasini rivojlantirish va qayta ishlash boshqarmasi boshlig‘i Asror Rustamov.- O‘tgan 2020 yil davomida Qizilqumda katta oltin koni topildi. Chuqurquduq nomli ushbu konda oltin zahiralari 130 tonna deb baholanmoqda. Ushbu oltin konini davlat balansiga oldik.
Shuningdek, Surxondaryodagi qo‘rg‘oshin-rux koni yonida yana bitta kon davlat zahirasiga o‘tkazdik. Bu Chinorsoy polimetall koni deyiladi. U yerda ham oltin va kumush va boshqa kompleks metall zahiralariga ega bo‘lgan kon tasdiqlandi.
Biz hozir yana bir katta mis koni ochilishi arafasida turibmiz. Olmaliqda zahirasi 200 ming tonnaga yaqin bo‘lgan mis koni davlat zahirasiga olindi.
Undan tashqari biz Qashqadaryo va Samarqand chegarasida Sariko‘l degan katta volfram konini davlat zahirasiga o‘tkazdik.
Yuqorida qayd etilgan konlarning ochilishida Respublikada geologiya sohasiga hukumat va prezident tomonidan qaratilayotgan e’tibor o‘zining ijobiy natijasini ko‘rsatmoqda, dedi qo‘mita boshlig‘i.