Adliya vazirligi homiylik manbalarni qabul qiluvchi jamg‘armalarda ochiqlik va shaffoflik standartini kiritishni taklif etmoqda

Joriy yil 28 avgust kuni adliya vazirligida nogironligi bo‘lgan shaxslarni himoya qilish sohasida faoliyat yurituvchi nodavlat notijorat tashkilotlari vakillari va faollari bilan uchrashuv bo‘lib o‘tdi. Uchrashuvda sohadagi muammolar yuzasidan fikrlar almashildi.

Pandemiya davrida davlat organlari ko‘magida jamg‘arilgan mablag‘lar, turli xil fondlarga kelib tushgan yordam pullari va mahsulotlarni ehtiyojmand aholi qatlamlariga manzilli va maqsadli yetkazish yuzasidan ayrim suiste’molchiliklar va talon-tarojliklar bo‘layotgani jamoatchilikning haqli savollarini keltirib chiqardi.

Shu munosabat bilan, jamoat fondlariga va boshqa notijorat tashkilotlariga ajratilgan mablag‘larni ishlatish jarayonining shaffofligini ta’minlash maqsadida, jamiyatning xavotiriga sabab bo‘layotgan talon-tarojliklarni oldini olish maqsadida umuman yangi bo‘lgan ochiqlik standartini joriy etish lozimligi vazirlik tomonidan ilgari surildi.

Ushbu standartda homiylar va uchinchi shaxslar mablag‘larini jalb qiluvchi va sarf qiluvchi har qanday davlat yoki nodavlat jamg‘armalari, notijorat tashkilotlari har bir ishlatilgan mablag‘ bo‘yicha jamiyat oldida aniq, to‘liq va kengaytirilgan hisobotni davriy ravishda berib borishining yuqori talablari belgilanishi ko‘zda tutilishi mumkin.

Taqdim etiladigan ma’lumotlar, ularning ko‘lami, turlari, yo‘nalishlari, ya’ni barcha axborot yagona manzilda chop etilishi bu borada jamoatchilik tomonidan tegishli nazorat va monitoring olib borilishiga imkon yaratadi.

Shu bilan birga, “Jamoatchilik nazorati to‘g‘risida”gi O‘zbekiston Respublikasi Qonunida jamoatchilik eshituvi, monitoringi va jamoatchilik ekspertizasini o‘tkazish nodavlat sektor orqali amalga oshirilishi, biroq, amaliyotda bu turdagi jamoatchilik nazorati shakllari yetarlicha amalga oshirilmayotganligi qayd etildi.

Jamoatchilik nazorati shakllaridan, ayniqsa, “jamoatchilik eshituvi”ning muhim ekanligi, chunki mazkur nazorat shakli davlat organlari va mansabdor shaxslarining faoliyatiga taalluqli va ijtimoiy ahamiyatga ega bo‘lgan masalalarni muhokama qilish uchun zarurligi, shu sababli jamoatchilik eshituvini yanada kuchaytirish lozim ekanligini ta’kidlandi.