Avval xabar qilganimizdek, monopol kompaniya UzAuto Motors avtomobillarning narxi nega oshirilganini ma’lum qildi.“UzAuto Motors kompaniyasi narxlarni qayta ko‘rib chiqish qarori narxlar kon’yunkturasi, shuningdek, ichki va tashqi bozordagi umumiy makroiqtisodiy vaziyatning o‘zgarishi bilan bog‘liq ekanligini va shu yilning 4 martiga qadar shartnoma imzolagan xaridorlar uchun barcha shartlar saqlab qolinadi, deyiladi kompaniya xabarnomasida.
Shuningdek, kompaniya “2017 yilning sentabr oyida so‘ngi marta avtomobil narxlari o‘zgarganidan buyon dollarning so‘mga nisbatan ayriboshlash kursi o‘sdi, xom ashyo narxlari, kommunal xizmatlar tariflari, transport xizmatlari narxlari oshdi.
Bundan tashqari, avval soliq imtiyozlariga ega bo‘lgan UzAuto Motors kompaniyasi 2019 yilning oktabr oyidan boshlab O‘zbekistonning amaldagi qonunchiligiga muvofiq soliqlarni umumiy asoslarda, jumladan QQS bo‘yicha to‘lashni boshladi. 2019 yilda kompaniya 2,5 trln. so‘m soliq to‘lagan bo‘lsa, joriy yil uchun esa ushbu ko‘rsatkich 4,2 trln. so‘mni tashkil qilishi kutilmoqda“, degan vajlarni keltirdi.
2019 yilda kompaniya kredit dasturlari, muddatli to‘lov va boshqa maxsus takliflar natijasida jami 52 mingdan ortiq mashina sotgan.
Shuningdek, avtomobil bozorida sog‘lom raqobatbardosh ekotizimni yaratish maqsadida “O‘zavtosanoat” mas’ul davlat organlariga O‘zbekiston bozoriga olib kiriladigan xorijiy avtomobillarga bojxona to‘lovlarini kamaytirish tashabbusi bilan chiqqanini bildirdi.
Rasmiy xabarnomada aytilishicha, ichki bozorda raqobatning kuchayishi UzAuto Motors kompaniyasining boshqaruv tizimini takomillashtirishga, kompaniyaning raqobatbardoshligini, shuningdek ishlab chiqarilayotgan avtomobillarning sifati va hammabopligini oshirishga imkon beradi.