Yangi yil bayramlaridan keyin 5 yanvar kuni o‘z ishini boshlagan Moskva birjasida 2015 yildagi birinchi savdo kuni Rossiya valyutasi uchun omadsiz kechdi. Rubl narxi butun savdo kuni davomida neft narxi tushishi ortidan ham dollarga, ham evroga nisbatan 4 foizga arzonlashib ketdi. Bu haqda «ntv.ru»ga asoslanib «kun.uz» xabar bermoqda
.
5 yanvar kunidagi savdolar yopilishiga yaqin rublning dollarga nisbatan kursi 61 rublni, evroga nisbatan 72,5 rublni tashkil etdi. AQSh va Evropa pul birliklari rublga nisbatan bir kun ichida 5 rublga qimmatlab ketdi.
30 dekabr savdolar yopilishi oldidan dollar 56 rublga, evro esa 68 rublga baholangan edi. Rossiya Markaziy banki 1-12 yanvar kunlari uchun xorijiy valyutalar rasmiy kursini taxminan aynan shu narx atrofida o‘rnatgan edi.
Arzonlashayotgan neft rublning narxini kun bo‘yi pastga tortdi. Neft narxi oxirgi 5 yil ichida yangi antirekord o‘rnatdi. 5 yanvar kuni Brent markasidagi neft narxi 3,5 dollarga arzonlashib, bir barrel neft narxi 53 dollardan kamroqni tashkil qildi, WTI markasidagi neft esa 2,5 dollarga arzonlashib, ushbu turdagi neftning bir barreli narxi 50 dollardan kamroqni tashkil qildi.