O‘zbekistonda 2014-2015 yillar davomida yirik aksionerlik kompaniyalari, uyushmalar va birlashmalarda axborot tizimini joriy qilish bo‘yicha umumiy miqdori 330 milliard so‘mdan ziyodroq summani tashkil qilgan 86ta loyiha bosqichma-bosqich amalga oshiriladi, deb xabar beradi "Jahon” axborot agentligi O‘zbekiston Respublikasi Aloqa, axborotlashtirish va telekommunikasion texnologiyalar davlat qo‘mitasining matbuot xizmatiga iqtibos keltirgan holda.
Ma’lum qilinishicha, bu loyihalar sanoatning boshqaruv va ishlab chiqarish jarayonlariga eng zamonaviy axborot tizimlari va dasturiy mahsulotlarini joriy qilish davlat dasturi doirasida amalga oshirilmoqda.
O‘zbekiston dasturiy mahsulotlar bozorining rivojlanishiga alohida e’tibor qaratilmoqda. Shu maqsadda dasturiy ta’minot ishlab chiqaruvchi kompaniyalar milliy ro‘yxati tuzilgan bo‘lib, hozirda bu ro‘yxatga respublikadagi 69ta kompaniyas nomi kiritilgan. Dasturiy mahsulot yaratuvchilar katalogi "software.uz”da 1600ta dastur haqida ma’lumotlar berilgan.
Ma’lumot uchun, 2017 yilning 1 yanvariga qadar O‘zbekistonning dasturiy ta’minot ishlab chiqaruvchi kompaniyalari mamlakatga xorijdan o‘z ehtiyojlari uchun olib kirayotgan uskunalar, butlovchi qismlar, detallar, texnologik hujjatlar va dasturiy ta’minot uchun bojxona to‘lovlari to‘lashdan ozod etilgan.
Bu imtiyozlar O‘zbekiston Prezidentining 2013 yil 20 sentyabrdagi "Mamlakatimizning dasturiy ta’minot vositalari ishlab chiquvchilarini rag‘batlantirishni yanada kuchaytirish chora-tadbirlari to‘g‘risida”gi qaroriga asosan joriy qilingan.
Axborot tizimlari va dasturiy mahsulotlarni ishlab chiqarish sohasiga xorijiy sarmoyalarni jalb qilish maqsadida axborot texnologiyalari sohasida faoliyat yurituvchi etakchi xorijiy kompaniyalar bilan qo‘shma korxonalar (misol uchun, Janubiy Koreyaning LG CNS kompaniyasi bilan) tuzish bo‘yicha qarorlar qabul qilinmoqda.
Manba va foto: Kun.uz