«Real» yarimhimoyachisi Luka Modrich klubning shartnomani uzaytirish borasidagi birinchi taklifiga rad javobini berdi, deb xabar bermoqda Kun.uz.Xabarda aytilishicha, Modrich shu yilning o‘zida ko‘plab shaxsiy sovrinlarga ega bo‘lgani, xususan UYeFA tomonidan Yevropada 2017/18 mavsumining eng yaxshi futbolchisi deb topilgani, FIFAning «Yil futbolchisi» va France Football tasnifidagi «Oltin to‘p»ni qo‘lga kiritganini hisobga olib, «Real»da kamida Serxio Ramosning maoshi darajasida haq olishni istamoqda va moliyaviy jihatdan yaxshiroq taklif kutmoqda.
Shu bilan birga, JCh-2018 finalchisi 2020 yilgacha mo‘ljallangan joriy shartnomasi muddatini uzaytirmoqchi emas, bitimni yangilash orqali faqat maoshi oshirilishiga erishmoqchi.
Xavbekning amaldagi shartnomasi muddati 2020 yil yozigacha mo‘ljallangan. Joriy yil yozda unga «Inter»dan jiddiy qiziqish bo‘lgan, ammo, manbaga ko‘ra, Luka «qaymoqranglilar» bilan yanada manfaatli yangi bitim imzolashni ko‘zlab, Madridda qolgan.
Agar muzokaralar muvaffaqiyatsiz yakunlansa, «Real» xorvatiyalik futbolchisini 2019 yil yozida «Inter»ga sotib yuborishi mumkin. Milanliklar futbolchiga yiliga 10 million yevro miqdoridagi maosh va’da qilishgan.
Eslatib o‘tamiz, shu hafta Modrich karerasini aynan «Real»da yakunlashni istayotgani haqida aytgan edi. Kecha esa navbatdagi shaxsiy sovrinini qo‘lga kiritdi – Bolqon yarimorolida yilning eng yaxshi sportchisi bo‘ldi.