Oʻzbekiston boks jamoasi yetakchisi, Rio Olimpiadasi chempioni, Osiyo chempioni va Osiyo oʻyinlari kumush medali sovrindori Hasanboy Doʻsmatov final jangidan keyin “Kun.uz” muxbiriga intervyu berdi.U finaldagi raqibi va kelajak rejalari haqidagi fikrlarni bildirib oʻtgan.
«Oʻzbekiston xalqini mustaqillik bayramining 27 yilligi bilan tabriklayman. Turnirda barchamiz bor kuchimiz bilan harakat qildik. Bugun olgan kumush medalimni Tokio Olimpiadasida oltin medalga aylantirishga vaʼda beraman.
Amit bilan avval ikki marta jang qilganman, 2017 yili Osiyo chempionatida va jahon chempionatida. Ikki safar ham yutgandim. U oʻz ustida ishlagani koʻrinib turibdi.
Men bu musobaqaga kelishdan oldin 56 kg vazn toifasini 49 kg vaznga tushirdim. Bu ancha qiyin boʻldi. Endi 52 kilogrammgacha boʻlgan vaznda ishtirok etmoqchiman. Kelajakda musobaqalarda 10 vazn toifasida emas, 8 vazn toifasida bahslar oʻtkazilishi mumkin. Bu holda boshqalar ham vaznini oʻzgartiradi», degan Hasanboy Doʻsmatov.
Maʼlumot uchun, ayni vaqtda Oʻzbekiston jamoasi sharafini -52 kg vazn toifasida Jasurbek Latipov himoya qiladi. U Osiyo oʻyinlari finalida gʻolib chiqib, oltin medalni qoʻlga kiritdi.