Chet el fuqarolari va fuqaroligi boʻlmagan shaxslarni doimiy va vaqtincha propiska qilish tartibini takomillashtirish chora-tadbirlari toʻgʻrisidagi prezident qarori qabul qilindi.Qarorga muvofiq, Qoraqalpogʻiston Respublikasi va viloyatlarda (Toshkent viloyatidan tashqari) boshqa davlatlardan kelgan va doimiy propiska qilinish huquqiga ega boʻlgan shaxslar – chet el fuqarolari va fuqaroligi boʻlmagan shaxslar toifalari roʻyxati tasdiqlandi.
Endilikda chet el fuqarolari va fuqaroligi boʻlmagan shaxslarni doimiy propiska qilish quyidagi roʻyxat asosida amalga oshiriladi:
qonun hujjatlariga muvofiq sotib olingan uy-joyga ega boʻlgan chet el davlatlarning fuqarolari va fuqaroligi boʻlmagan shaxslar – xususiy mulk qilib olingan uy-joyga;
qarindoshlar – mazkur Roʻyxat kuchga kirgunga qadar oʻzlarining toʻgʻri shajara boʻyicha birinchi va ikkinchi darajadagi qarindoshlari doimiy propiska qilingan uy-joy maydoniga;
er (xotin) – xotini (eri) doimiy propiska qilingan uy-joy maydoniga, basharti kamida besh yil birgalikda yashayotgan boʻlsa;
vasiylik va homiylikdagi shaxslar – vasiy (homiy) doimiy propiska qilingan uy-joy maydoniga;
ota-onasi boʻlmagan voyaga yetmagan tugʻishgan aka-uka va opa-singillar – oʻzlarining tugʻishgan aka-uka yoki opa-singillari doimiy propiska qilingan uy-joy maydoniga;
davlat tashkilotlariga ishga taklif etiladigan mutaxassislar tegishli organ yoki tashkilot rahbarining iltimosnomasiga koʻra, shuningdek, ularning oila aʼzolari (eri, xotini, shuningdek, ularning oʻz oilasi boʻlmagan farzandlari) – mazkur shaxslar lavozimda turadigan davrga;
Oʻzbekistonda tugʻilgan yoki ilgari doimiy propiska qilingan chet el fuqarolari va fuqaroligi boʻlmagan shaxslar – doimiy yashash uchun Qoraqalpogʻiston Respublikasi va viloyatlarga (Toshkent viloyatidan tashqari) qaytib kelganida.
Adliya vazirligining “Huquqiy axborot” kanali.