Avvalroq, Gulnora Karimovaning advokati u bilan uchrashish uchun Toshkentga kelgani haqida xabar berilgan edi. Advokat Greguar Manja mijozi bilan uchrashib, Shveysariya prokuraturasi Karimovaga tegishli 800 million dollar pulni O‘zbekistonga qaytarish harakatini boshlagani yuzasidan shikoyat arizasi topshirishni muhokama qilmoqchi edi, deb yozmoqda “Hordiq” nashri.Joriy yilning 31 iyul kuni Shveysariyaning Jinoiy ishlar bo‘yicha federal sudi Gulnora Karimovaning appelyatsiyasini bekor qilgan. Mazkur qaror Karimovaga tegishli deb taxmin qilingan 800 million dollar pulni O‘zbekistonga qaytarish jarayonida muhim qadam bo‘lgan.
Jenevalik advokat Greguar Manja tomonidan Jinoiy ishlar bo‘yicha federal sudga berilgan shikoyat apellyatsiyasida federal prokuraturaning Shveysariya banklarida muzlatib qo‘yilgan 800 million dollarni musodara qilish haqidagi qaroriga norozilik bildirilgan.
Joriy yil 22 may kuni Shveysariya prokuraturasi ikkita order chiqargandi. Unda 2012 yil Jeneva va Syurixdagi banklarda muzlatib qo‘yilgan 800 million dollarning 686,7 million dollarini O‘zbekistonga qaytarish nazarda tutilgandi.
Bunday qaror chiqarilishiga Gulnora Karimova ishongan ikki shaxs: Gayanya Avakyan va Rustam Madumarovlarning iqror bo‘lib, bergan ko‘rsatmalari asos bo‘lgan. Ular bu pullar O‘zbekistondan o‘g‘irlanganini tan olganlar va qaytarilishi kerakligini aytganlar.
Shu bilan birga, Avakyan va Madumarov ularga nisbatan ochilgan jinoiy ishni Gulnora Karimova ishi yakunlanmasidan nihoyasiga yetkazishlarini so‘ragan.
Eslatib o‘tish joizki, O‘zbekiston Bosh prokuraturasi Gulnora Karimova jinoiy ishi bo‘yicha to‘liq rasmiy ma’lumotni e’lon qilgan edi. Unda qayd etilishicha, hozirda 12 ta xorijiy davlat hududida 1 mlrd 394,1 mln AQSH dollari, 63,5 mln yevro, 27,1 mln funt va 18,5 mln frank miqdordagi mablag‘ legallashtirilgan.
Gulnora Karimovaning korrupsiya va pulni o‘zlashtirish bilan bog‘liq jinoyatlarni sodir etishdagi aybi uyushgan jinoiy guruh a’zolari N.Sodiqov, R.Madumarov, Sh.Sobirov va boshqalarning, guvohlar, jabrlanuvchilarning ko‘rsatuvlari, uyushgan guruh nazoratidagi 45 ta xo‘jalik yurituvchi subyektlar va 16 ta kompaniyalarning faoliyatini tekshirish materiallari, olingan yozma va ashyoviy dalillar, ekspertiza xulosalari hamda ish bo‘yicha to‘plangan boshqa dalillar bilan o‘z tasdig‘ini topgan.
Gulnora Karimovaga O‘zbekiston Respublikasi Jinoyat kodeksining 168, 178, 182, 189, 228 va 243-moddalari bilan ayblov e’lon qilinib, unga nisbatan qamoqqa olish ehtiyot chorasi qo‘llanilgan.