Samarqand viloyati sobiq hokimi Turob Jo‘rayev qo‘lga olingach, besh kun ichida yana 28 ta qurilish kompaniyalari rahbarlari ham qamoqqa olindi. Hozir ular tergovga jalb etilgan. O‘nlab qurilish kompaniyalari rahbarlari imi-jimida mamlakatdan chiqib ketgan.Ayni vaqtda Samarqand viloyatida davlat xavfsizlik xizmati rahbari Ixtiyor Abdullayev, ichki ishlar vaziri Po‘lat Bobojonov hamda bosh prokuror Otabek Murodovlar nazorati ostida uchta guruh ish olib bormoqda. Samarqand viloyati sobiq hokimi Turob Jo‘rayevga pora bergan jami 28 ta qurilish kompaniyalari yetakchilari so‘roq qilinmoqda. Shubhasiz, pora viloyat hududida, shahar ichkarisida ko‘p qavatli uylar qurish uchun yer ajratib berish yoki ajratilgan yerdan foydalanishga ruxsat berishi uchun taqdim etilgan. Turob Jo‘rayevning sobiq kapital qurilish ishlari bo‘yicha sobiq o‘rinbosari O‘tkir Abdullayevga nisbatan biroz yengillik yaratildi. U tergovga o‘z uyidan qatnamoqda. Ammo ishga chiqqani yo‘q.
— Ularning dastidan Samarqanddagi eng noyob tarixiy obidalar yo‘q qilinish pallasiga kelib qolgandi, — dedi huquqni muhofaza qilish tashkiloti xodimlaridan biri. — Bu sobiq hokimni umuman qiziqtirmasdi. Axir, sayyohlar ko‘p qavatli zamonaviy uylarni emas, o‘sha tarixiy obidalarni tomosha qilish uchun Samarqandga tashrif buyuradi-ku!..
Samarqand viloyatidagi huquqni muhofaza qilish tashkiloti vakili aytdiki, tekshiruvlar natijasida 3 ming 458 ta «quruq» kompaniyalar borligi aniqlandi. «Quruq» deyilishining ma’nisi shundaki, bu kompaniyalar faqat qog‘ozda bor, ularning banklarda hisob raqamlari ham yo‘q. Barchalari qurilish kompaniyalari hisoblanib, faqat harom pul topish uchun viloyat rahbarlarining koriga yaragan. Hozirda o‘sha qurilish kompaniyalarining o‘nlab rahbarlari go‘yoki dam olish uchun Turkiya, Rossiya, Ispaniya, Chexiya davlatlariga jo‘nab ketgan. Ular qaytmaydi. Sababi, qilib qo‘ygan harom ishlari oshkor bo‘lganini juda yaxshi biladi.
Turob Jo‘rayev kompaniyalar rahbarlaridan pora undirganlarini tan oldi…
Turob Jo‘rayevning qarindoshlaridan biri aytdiki, sobiq viloyat hokimi qandli diabet va nafas yo‘llari xastaliklaridan azoblanmoqda. U tergov izolyatorida juda og‘ir sharoitlarda saqlanmoqda va tergov qilinmoqda.
Shu o‘rinda bir gapni aytgisi keladi odamning. Temir sandiqdagi o‘sha 1 million dollar pul halol bo‘lsa, sobiq hokim xastalikka yo‘liqmasdi, huquqni muhofaza qilish tashkilotlari vakillari, keng jamoatchilik uni poraxo‘rlikda va boshqa ayblar bilan ayblamasdi. Harom, baribir harom-da! U bir kunmas bir kun baribir teshib chiqadi. Tarixda mashhur bir sarkarda podshohlardan biri aytganki, narigi dunyoga hech kim to‘plagan boyligi uyoqda qolsin, bir chimdim qumni ham ko‘tarib keta olmaydi. Yaratganning huzuriga quruq qo‘l bilan boradi. Ishqilib, xudoning bandalarini haromxo‘rlikdan asrasin!
Manba: Hordiq.uz