Moskva va Vashington Vladimir Putin va Donald Trampning uchrashishi haqida kelishuvga erishdi. Bu haqda Rossiya yetakchisining yordamchisi Yuriy Ushakov ma’lum qildi, deb yozadi “RIA Novosti”ga tayanib Daryo nashri.“Mazkur masala tomonlarimiz o‘rtasida anchadan buyon muhokama qilinmoqda, u yopiq kanallar orqali muhokama etilmoqda. Sammit o‘tkazish, hatto uni o‘tkazish vaqti va joyi haqida kelishuvga erishilganligini aytishim mumkin. Bu haqda amerikalik hamkasblarimiz bilan birgalikda ertaga e’lon qilamiz”, — dedi u jurnalistlarga.
Ushakov, uchrashuv uchinchi mamlakatda o‘tishiga aniqlik kiritdi.
24 iyun, yakshanba kuni Avstriyaning Kronen Zeitung gazetasi sammit o‘tkaziladigan ehtimoliy joy Vena bo‘lishi mumkinligini ma’lum qilgan edi. Keyinroq Politico nashri uchrashuv Xelsinkida o‘tkazilishi ehtimoli haqida xabar berdi.
Moskva va Vashington bu ma’lumotni hozircha izohlamadi.