Farg‘ona viloyati bojxona boshqarmasi xodimlari DXX va DChQQ xodimlari bilan hamkorlikda o‘tkazilgan tezkor tadbir davomida qo‘shni davlatdan “Andarxon” chegara bojxona posti orqali mamlakatimizga kirib kelayotgan fuqaro B.V. boshqaruvidagi “ISUZU” rusumli yuk avtomashinasini ko‘rikdan o‘tkazishdi.Natijada ushbu avtomashina yukxonasida qiymati 1 mlrd. 404 mln. so‘mlik 2 xil turdagi xorijda ishlab chiqarilgan jami 184 500 quti “Business Royal” va “Milano”nomli tamaki mahsulotlari borligi aniqlandi. Bu haqda Davlat bojxona qo‘mitasi axborot xizmati xabar bermoqda.
Shundan so‘ng olib borilgan qo‘shimcha tezkor-qidiruv tadbirlari davomida Dang‘ara tumani Katta Ravon ko‘chasida yashovchi fuqaro M.B.ning yashash xonadoni xolislar ishtirokida ko‘zdan kechirilganida, xonadonda bojxona rasmiylashtiruvidan o‘tganligini tasdiqlovchi hujjatlari bo‘lmagan qiymati 105 000 000 so‘mlik 15 000 quti “Milano” nomli tamaki mahsulotlari noqonuniy saqlanayotganligi aniqlandi.
O‘tkazilgan tadbir davomida umumiy qiymati 1 mlrd. 509 mln. so‘mlik jami 199 500 quti xorijda ishlab chiqarilgan, aksiz markalari bo‘lmagan tamaki mahsulotlari ashyoviy dalil tariqasida olindi.
Hozirda ushbu holat yuzasidan tekshiruv harakatlari olib borilmoqda.
Manba: Kun.uz