17 dekabr kuni Vladivostok hududiga Janubiy Koreya flotining ikki kemasi norasmiy tashrif bilan kirib kelgan. Bu haqida Rossiya Tinch okean flotining matbuot xizmatiga asoslanib, “Interfaks” nashri xabar beradi.
“Vladivostok portiga Janubiy Koreya harbiy- dengiz kuchlariga tegishli “Soy Yon” esminesi hamda “Chxondji” tankeri “langar tashladi”. Bu kemalarning tashrifi ikki davlat flotlari o‘rtasidagi hamkorlikni mustahkamlash uchun xizmat qiladi”, – deyiladi manba xabarida.
Janubiy Koreyalik dengizchilar Vladivostok hududida 4 kun davomida mehmon bo‘lishadi. Tashrif dasturidan bu dengizchilarning Rossiya Tinch Okeani floti komandasi a’zolari va shahar hokimiyati vakillari bilan uchrashish hamda Vladivostokning diqqatga sazovor joylarini ziyorat qilish qismlari o‘rin olgan.