Rossiya tashqi ishlar vaziri Sergey Lavrov Pxenyanning yaqinda amalga oshirgan navbatdagi ballistik raketa sinovlari xususida to‘xtalarkan, xudo ko‘rsatmasin, basharti Shimoliy Koreya hamda Amerika o‘rtasida sovuq urush boshlanadigan bo‘lsa, birinchi qurbonlar Janubiy Koreya hamda Yaponiya hisoblanadi. Nega?— Amerika soniya sayin bu ikki davlatni urush o‘chog‘i tomon yetaklamoqda, — dedi Lavrov. — Ammo Kim Chen In tarafdan hujum uyushtirilsa, Amerika darrov o‘zini chetga oladi. Balogardonlar esa Janubiy Koreya, Yaponiya bo‘lib qolaveradi. Agar ayni kunda ham Amerika o‘z «ittifoqdosh»lari bilan harbiy o‘quv mashg‘ulotlariga zo‘r bermasa, Shimoliy Koreya muammosini diplomatik tarzda hal etish mumkin edi. Afsuski, Tramp bunday dialogni xohlamayapti chog‘i…
Eslatib o‘tamiz, kuni kecha Shimoliy Koreya «Xvason-15» deb nomlangan yangi qit’alararo ballistik raketasini sinovdan o‘tkazdi. Raketaning umumiy balandligi 4 ming 475 kilometr, parvoz masofasi esa 950 kilometrni tashkil etdi. Ballistik raketa havoda jami 53 daqiqa parvoz qilib, Yaponiyaning iqtisodiy hududiga, Aomoridan 250 kilometr uzoqlikka borib tushdi. Kim Chen Inning aytishicha, bu ballistik raketa ham yadro qurolini o‘zida mujassam etgan holda Amerikaning istalgan hududigacha yetib bora oladi.
Manba: Hordiq.uz