Nyu-York meri AQSh hududida polisiya qora tanli o‘smirlarga nisbatan yaxshi munosabatda emasligini tan oldi. 2014 yil 1 yanvarda Nyu-York shahri merligiga saylangan Bill de Blazio mamlakat hududidagi o‘smir yoshdagi qora tanlilar polisiya bilan ehtiyotkorona muomilada bo‘lishi kerakligini ta’kidladi. Bu haqida u ABC telekanali muxbiri bilan suhbat chog‘ida gapirib o‘tgan, deb xabar bermoqda «TASS» malumotiga asoslanib «Kun.uz».Bill de Blazio Nyu-York merligiga saylangan ilk demokratlar vakili bo‘lib, u qora tanli ayol Chirleyn Makkreyga uylangani ham e’tiborlidir. Ularning Chiara va Dante ismli farzandlari ham bor.
Shahar meri o‘zining o‘g‘li bilan ham tarbiyaviy suhbat o‘tkazib, unga ko‘chada nojo‘ya xatti-harakat sodir etmaslikni tayinlaganini bildirgan.
«Mamlakatda hozir shunday qaltis vaziyat hukm surmoqda. Barchangizga bolalar bilan shunday suhbat o‘tkazishni tavsiya qilaman», – deydi Bill de Blazio.
O‘z navbatida Nyu-York polisiya xizmati boshlig‘i Uilyam Bretton shahar merining fikrlarini inkor qilib, polisiya tomonidan irqchilik sodir etilmayotganini, polisiya har doimgidek o‘z ishini bajarayotganini ma’lum qilgan.
«Biz tomonimizdan shahar fuqarolariga hech qanaqa tahdid mavjud emas», – deya intervyu bergan u CBS telekanaliga.
Eslatib o‘tamiz, noyabr oyi oxirida AQShning Fergyuson shaharchasida 18 yoshli qora tanli o‘smir Maykl Braunni otib o‘ldirgan polisiyachi Darren Uilson sud tomonidan oqlangach, fuqarolar norozilik bildirib, to‘s-to‘polon ko‘tarishgan va ularning o‘nlab nafari hibsga olingan edi. Dekabr boshida esa shunga o‘xshash holat Nyu-York shahrida bo‘lib o‘tib, bu safar Erik Garner ismli qora tanli fuqaro polisiyachi Daniel Pantelo tomonidan nohaq o‘ldirilganiga qaramasdan, sud uni jazosiz qoldirgani namoyishlarga sabab bo‘lgan, natijada polisiya bilan to‘qnashuvlar davomida yuzlab bezorilar qamoqqa tashlangan edi.